Maliyyə

Ana səhifə

Maliyyə

Donna Dousett-Koirolo: «Bu il Azərbaycan bankları üçün mürəkkəb il olacaq»

02 fevral 2009 17:04 (UTC +04:00)

Bakı. Nicat Mustafayev – APA-Economics. Bu il Azərbaycanın bank sistemi üçün mürəkkəb dövr olacaq. «APA-Economics»in məlumatına görə, Bakıda son rəsmi səfərində olan Dünya Bankının (DB) Cənubi Qafqaz regionu üzrə sabiq direktoru xanım Donna Dousett-Koirolo bu gün keçirilən mətbuat konfransında bildirib.
DB təmsilçisinin sözlərinə görə, hazırda bir sıra ölkənin bank sistemində ciddi likvidlik problemləri mövcuddur: «Banklar böhrana güclü tərəfləri ilə daxil olmalıdır. Azərbaycanda depozit və kreditlərin müxtəlif valyutada olması, portfellərin sağlamlığı müşahidə olunur. Bu da Azərbaycan Milli Bankının yeritdiyi güclü siyasətinin nəticəsidir».
D.Dousett-Koirolonun fikrincə, bu təcrübə bir çox dövlət üçün nümunəvi ola bilər. Lakin buna baxmayaraq, banklar özləri üzərində hələ işləməlidir və problemlərin yeni həlli yollarını tapmalıdır: «Belə şəraitdə bankların lazımi maliyyə vəsaitləri olmalıdır və bu istiqamətdə hökumətlə aparılan dialoq davam etdirilməlidir».
Xatırladaq ki, hazırda Azərbaycanda 45 bank təşkilatı fəaliyyət göstərir və ötən ilin sonunda məcmu xarici öhdəliklərin həcmi 2,5 mlrd. ABŞ dollarına çatıb.
Qeyd edək ki, Azərbaycan DB ilə 1992-ci ildən əməkdaşlıq edir. Ötən müddət ərzində bank təxminən 45 layihənin icrasına Azərbaycana 2 mlrd. ABŞ dolları məbləğində maliyyə yardımı göstərib.