Maliyyə

Ana səhifə

Maliyyə

Azərbaycanda əhalinin pul yığım qabiliyyəti zəifləyir

17 mart 2009 10:23 (UTC +04:00)

Bakı. Vahab Rzayev – APA-Economics. Cari ilin yanvar-fevral ayları ərzində Azərbaycanda əhalinin əldə etdiyi gəlirlərin həcmi 3,069 mlrd. manat, adambaşı düşən gəlirin orta məbləği isə 356,1 manat təşkil edib. Dövlət Statistika Komitəsinin «APA-Economics»ə verilən məlumata əsasən, gəlirlərin 75%-i son istehlaka, 10,8%-i vergilər, sosial sığorta və könüllü üzvlük haqlarının ödənilməsinə, 14,2%-i isə əmanətlərin və kapitalın artırılmasına, yəni müxtəlif alətlər vasitəsi ilə yığımların artırılmasına yönəldilib.
Ötən ilin yekunlarına görə, əhali tərəfindən 20,1 mlrd. manat məcmu, 2 343 manat adambaşına əldə olunan gəlirlərin 66,1%-i son istehlaka, 10,2%-i vergilər, sosial sığorta və könüllü üzvlük haqlarının ödənilməsinə, 23,7%-i isə əmanətlərin və kapitalın artırılmasına sərf olunub. Beləliklə, cari ilin ilk ayları ərzində əhalinin əmanət və digər pul ehtiyatlarının artırılmasına yönəldilən gəlirlərinin ümumi xərclərdə xüsusi çəkisi illik göstərici ilə müqayisədə 9,5 faiz bəndi və ya 1,7 dəfə azalıb. Eyni zamanda, son istehlaka, yəni malların alınmasına və xidmətlərin ödənilməsinə sərf elədiyi gəlirlərin xüsusi çəkisi 8,9 faiz bəndi artıb. Hətta onu nəzərə almaq vacibdir ki, 75%-lik istehlak xərcləri yanvar-fevral aylarında qeydə alınmış 1,4%-lik deflyasiya şəraitində müşahidə olunub. Yəni, ötən ildəki inflyasiya səviyyəsi (20,8%) cari ildə də müşahidə olunacağı təqdirdə, son istehlaka yönəldilən xərclərin həcmi kəskin artacaqdır, əmanət və digər pul ehtiyatlarının artırılmasına yönəldilən gəlirlərin xüsusi çəkisi, yəni əhalinin pulların yığım qabiliyyəti əks-mütənasib olaraq azalacaqdır.
Bu göstəricilər 2009-cu ilin ilk aylarında əhalinin cari xərclərinin (deflyasiya şəraitində) artdığını, pul ehtiyatlarının genişlənməsi imkanlarının isə daraldığını əks etdirir.