Maliyyə

Ana səhifə

Maliyyə

Azərbaycanın xalis beynəlxalq investisiya mövqeyi müsbət 12,6 mlrd. dollara çatıb

10 aprel 2009 12:49 (UTC +04:00)

Bakı. Vahab Rzayev – APA-Economics. Azərbaycanın beynəlxalq investisiyalar balansında göstərilən məcmu aktivlərin həcmi 2009-cu ilin yanvar ayının 1-nə 28 548,5 mln. ABŞ dolları təşkil edib. Azərbaycan Milli Bankından «APA-Economics»ə verilən məlumata əsasən, aktivlərin tərkibində ehtiyat aktivləri 18 555,4 mln. dollar, xaricə birbaşa investisiyalar 5 232 mln. dollar olub. O cümlədən, neft-qaz sektoruna birbaşa investisiyaların həcmi 5 084 mln. dollar, digər sahələrə isə 148 mln. dollar təşkil edib. Qeyd edək ki, aktivlərin həcmi ötən ilin əvvəli ilə müqayisədə 14 380,7 mln. dollar və ya 101,5% artıb.
Bu ilin əvvəlinə Azərbaycanın məcmu öhdəlikləri 15 945,3 mln. dollar təşkil edib ki, bu da ötən ilin əvvəlinə nisbətən cəmi 804,3 mln. dollar və ya 5,3% çoxdur. Bu dərəcədə kiçik artım Azərbaycana birbaşa investisiyaların həcminin 2008-ci il ərzində cəmi 14,1 mln. dollar artması səbəbindən yaranıb. Qeyd edək ki, ölkəyə birbaşa investisiyaların tərkibində neft-qaz sektoru üzrə 581 mln. dollar və ya 14,5% həcmində azalması müşahidə olunub.
Beləliklə, 2009-cu ilin əvvəlinə Azərbaycanın xalis beynəlxalq investisiya mövqeyi müsbət 12 603,2 mln. dollar təşkil edib ki, bu göstərici son bir ildə 13 576,4 mln. dollar artıb, yəni ötən ilin əvvəlinə xalis beynəlxalq investisiya mövqeyi mənfi 973,2 mln. dollara bərabər olub:

(mln. ABŞ dolları)

Azərbaycanın beynəlxalq investisiyalar balansı
	01.01.2009	01.01.2008
Aktivlər	28 548,5	14 167,8
Xaricə birbaşa investisiya	5 232,0	4 676,4
Portfel investisiyaları	550,7	229,9
Digər investisiyalar*	4 210,4	1 882,3
Ehtiyat aktivləri	18 555,4	7 379,2
Öhdəliklər	15 945,3	15 141,0
Azərbaycana birbaşa investisiyalar	6 611,7	6 597,6
Portfel investisiyaları	177,3	203,9
Digər investisiyalar*	9 156,3	8 339,5
Xalis beynəlxalq investisiya mövqeyi	12 603,2	- 973,2

*Digər investisiyalara aktivlərdə və öhdəliklərdə müvafiq olaraq verilmiş və alınmış ticarət kreditləri, ssudalar, depozitlər və nağd valyuta daxildir.

Cədvəldən göründüyü kimi, Azərbaycanın ötən il xarici kreditor və investor mövqeləri əhəmiyyətli dərəcədə möhkəmlənib. Bu həm aktivlərin xeyli artması nəticəsində, həm də ölkənin öhdəliklərinin sabit qalaraq artmaması səbəbindən baş verib. Makroiqtisadi baxımdan, o cümlədən dünya iqtisadi böhranı fonunda çox aktual olan ölkənin xarici maliyyələşmədən asılılığının tam aradan qaldırılması baxımından, Azərbaycanın beynəlxalq investisiyalar balansının vəziyyəti çox pozitiv qiymətləndirilə bilər.