Maliyyə

Ana səhifə

Maliyyə

Azərbaycanda manatla verilən bank kreditləri üzrə faiz dərəcələri hüquqi şəxslər üçün azalır, fiziki şəxslər üçün isə artır

10 aprel 2009 13:20 (UTC +04:00)

Bakı. Vüqar İsrafilov – APA-Economics. Azərbaycanda fəaliyyət göstərən bankların milli valyuta ilə ayırdığı müştəri kreditləri üzrə orta faiz dərəcələri 2009-cu ilin fevral ayında 1,38 faiz bəndi azalma ilə illik 17,37%-ə çatıb. Bu barədə «APA-Economics»ə Azərbaycan Milli Bankından (AMB) məlumat verilib.

AMB-nin açıqladığı hesabata əsasən, ötən ilin müvafiq dövrü ilə müqayisədə borcalmalar üzrə dərəcələr orta hesabla 0,25 faiz bəndi enib. Bu zaman manatla hüquqi şəxslər üzrə orta faiz dərəcələri 1,02 faiz bəndi azalaraq illik 14,70%, fiziki şəxslər üzrə isə 0,87 faiz bəndi artaraq 21,66 % təşkil edib. Ev təsərrüfatlarına ayrılan kreditlərin bahalaşması ilin əvvəlindən 2,46 faiz bəndi səviyyəsində qiymətləndirilir.

Kreditlər üzrə orta faiz dərəcələri, %

Tarix	Kreditlərə görə orta		Hüquqi şəxslər üzrə		Fiziki şəxslər üzrə
Tarix	Manatla	Xarici valyuta ilə	Manatla	Xarici valyuta ilə	Manatla	Xarici valyuta ilə
01.03.08	17,62	16,65	15,72	14,24	20,79	21,31
01.04.08	17,71	17,87	15,85	16,20	20,84	21,06
01.05.08	17,89	16,61	16,01	14,37	20,96	20,89
01.06.08	17,94	14,07	15,86	11,51	21,05	20,61
01.07.08	17,76	14,11	15,55	11,52	20,94	21,05
01.08.08	18,21	14,10	15,95	11,71	21,38	21,38
01.09.08	18,22	14,67	16,00	11,92	21,25	21,40
01.10.08	18,25	14,70	16,10	11,98	21,21	21,50
01.11.08	17,99	14,89	15,92	12,46	21,12	21,41
01.12.08	18,08	14,32	15,88	11,93	21,35	21,34
01.01.09	17,45	14,52	14,87	12,37	21,53	21,52
01.02.09	18,75	16,93	16,44	15,53	22,03	21,69
01.03.09	17,37	16,81	14,70	15,31	21,66	20,33

Xarici valyutada verilən kreditlər üzrə bankların orta faiz dərəcəsi fevralda 0,12 faiz bəndi azalıb, halbuki ötən ilin müvafiq ayına nisbətən 0,16 faiz bəndi səviyyəsində artım müşahidə olunub. Cari ili martın 1-nə bu göstərici orta hesabla illik 16,81%-ə bərabər olub. Bu dövrdə hüquqi şəxslərə xarici valyutada verilən kreditlər üzrə orta faiz dərəcəsi ötən ilin müvafiq dövründəki 14,24%-dən hesabat dövrünün sonuna 15,31%-ə çatıb, fiziki şəxslərə xarici valyutada verilən kreditlər üzrə faiz dərəcəsi isə 21,31%-dən 20,33%-ə enib. Son bir ayda xarici valyutada ayrılan kreditlər üzrə faiz dərəcələri arasında əhəmiyyətli dəyişiklik baş verməyib.

Qeyd edək ki, manatla kreditlərlə depozitlər arasındakı fərq ötən ilin fevralındakı 6,4%-dən son tarixə 6,02%-ə düşüb, xarici valyutada kreditlərlə depozitlər arasındakı fərq isə 6,5%-dən 7,8%-ə qalxıb.