Maliyyə

Ana səhifə

Maliyyə

«Standard İnsurance» şirkətinin daxilolmaları 40% azalıb

14 aprel 2009 08:30 (UTC +04:00)

Bakı. Elnur Hüseynquluyev – APA-Economics. Azərbaycanın «Standard İnsurance» sığorta şirkətinin 2009-cu ilin yanvar-mart aylarında topladığı sığorta haqlarının həcmi 3,007 mln. manat təşkil edib ki, bu da ötən ilin analoji dövrü ilə müqayisədə 40% azdır. Şirkətin baş ofisindən «APA-Economics»ə verilən məlumata görə, sığorta riskləri üzrə ödənişlər 21% azalaraq 600,120 min manat təşkil edib.
Şirkətin sığorta daxilolmalarının strukturunda ən çox vəsait «Əmlakın yanğından və digər risklərdən sığortası» (1,128 mln. manat), «Avtonəqliyyat vasitələrinin sığortası» (467,054 min manat) və «Tibbi sığorta» (365,800 min manat) növləri üzrə toplanıb. Nəticədə, şirkətin məcmu daxilolmalarında «Əmlakın yanğından və digər risklərdən sığortası» növünün xüsusi çəkisi 37,5%, «Avtonəqliyyat vasitələrinin sığortası» 15,5% və «Tibbi sığorta»nın payı 12,2% təşkil edib.
Ödənişlərə gəldikdə isə, bu ilin I rübündə ən çox vəsait «Tibbi sığorta» (315,063 min manat) və «Avtonəqliyyat vasitələrinin sığortası» (277,785 min manat) növləri üzrə ödənilib. Ödənişlərdə «Tibbi sığorta»nın payı 52,5%, «Avtonəqliyyat vasitələrinin sığortası» növünün payı isə 46,3% olub.
Qeyd edək ki, bu müddət ərzində şirkətin könüllü sığorta növləri üzrə daxilolmaları 2,352 mln. manat, icbari sığorta növləri üzrə isə 655,338 min manat təşkil edib. Eyni zamanda, könüllü sığorta növləri üzrə ödənişlərin həcmi 596,551 min manat, icbari sığorta növləri üzrə isə bu göstərici 3,569 min manat olub.
Xatırladaq ki, təsisçisi «AB Standard» Şirkətlər Qrupu olan «Standard İnsurance» şirkəti 2002-ci ildən fəaliyyət göstərir. Cari ilin aprel ayının 1-nə şirkətin nizamnamə kapitalı 8 mln. manat olub. Şirkət hazırda 4 icbari və 20 könüllü sığorta növü üzrə xidmət göstərir.