Maliyyə

Ana səhifə

Maliyyə

Azərbaycan Korporativ İdarəetmə Layihəsinin növbəti pilot şirkəti seçilib

22 oktyabr 2009 13:59 (UTC +04:00)

Bakı. Nicat Mustafayev – APA-Economics. Beynəlxalq Maliyyə Korporasiyası (IFC), İsveçrə İqtisadi Məsələlər üzrə Dövlət Katibliyi (SECO) ilə birgə Azərbaycan Korporativ İdarəetmə Layihəsinin (AKİL) ikinci fazasının növbəti pilot şirkətini seçib.

IFC-nin Bakı ofisindən «APA-Economics»ə verdiyi məlumata görə, layihənin növbəti – üçüncü pilot iştirakçısı kimi Azərbaycanın «A-Group» sığorta şirkəti seçilib. IFC şirkətin korporativ idarəetmə təcrübəsini qiymətləndirəcək və onun təkmilləşdirilməsi və qabaqcıl beynəlxalq təcrübəyə uyğunlaşdırılması üçün tədbirlər görəcək. IFC bu təşkilatın direktorları, menecerləri və əsas səhmdarları üçün konsultasiyalar və təlimlər keçirəcək. Bundan başqa, IFC sənədləşmənin təkmilləşdirilməsi, maliyyə hesabatlığı və məlumatın açıqlanmasının gücləndirilməsi, daxili nəzarət və daxili audit funksiyasının yaxşılaşdırılması işində sığorta şirkətinə yardım edəcək.

Qeyd edək ki, ötən ilin iyun ayında layihənin ikinci fazasına başlanılıb və IFC tərəfindən artıq iki pilot şirkət - «CredAgro» qeyri-bank kredit təşkilatı və «Turan Bank» ASC seçilib. Ümumiyyətlə, layihənin ikinci fazası çərçivəsində altı pilot şirkət seçiləcək. AKİL-in ikinci fazası üç il davam edəcək. Layihənin birinci fazasında isə 6 pilot şirkət seçilib və nəticədə, onlar 100 mln. ABŞ dollarından artıq vəsait cəlb edə bilib.

Xatırladaq ki, Azərbaycan 1995-ci ildə IFC-yə üzv olub. Bu günədək IFC ölkədəki 37 layihəyə 266 mln. dollar, bankçılıq, korporativ idarəetmə, lizinq, kiçik və orta müəssisələrin inkişafı, ipoteka kreditləşməsi, qiymətli kağızlar bazarının və digər sahələrin inkişafı üçün 104 mln. dollar məbləğində sindikatlaşdırılmış kredit ayırıb.