Maliyyə

Ana səhifə

Maliyyə

Azərbaycanın Beynəlxalq Sığorta Şirkətinə reytinq verilib

28 oktyabr 2009 10:38 (UTC +04:00)

Bakı. Vahab Rzayev – APA-Economics. «Moody’s Investors Service» beynəlxalq reytinq agentliyi Beynəlxalq Sığorta Şirkətinə «stabil» proqnozlu «B2» səviyyəli maliyyə sabitliyi reytinqi (insurance financial strength rating, IFSR) təqdim edib. Sığorta şirkətindən «APA-Economics»ə verilən məlumata görə, Beynəlxalq Sığorta Şirkəti Azərbaycanın sığorta sektorunda ən yüksək reytinq dərəcəsi alan yeganə sığorta təşkilatıdır.

«Moody’s Investors Service» tərəfindən Beynəlxalq Sığorta Şirkətinin qiymətləndirilməsi, şirkətin qəbul etdiyi risklərə nisbətdə güclü kapitala malik olması, sığorta bazarında tutduğu yüksək mövqe, aktivlərin keyfiyyətli olmaqla riskə məruzluğunun məhdudluğuna əsaslanıb. Yüksək reytinqin təqdim olunması Beynəlxalq Sığorta Şirkətinin Azərbaycanın sığorta şirkətləri arasında möhkəm mövqeyə, bazar payına, biznesin yüksək rentabellik göstəricilərinə malik olmasının, eləcə də etibarlı sığorta şirkəti kimi formalaşmasının göstəricisidir. Reytinqin təqdim olunması ilə əlaqədar Beynəlxalq Sığorta Şirkətindən bildiriblər ki, qabaqcıl beynəlxalq reytinq agentliklərindən biri olan «Moody’s Investors Service» tərəfindən Azərbaycanın sığorta bazarı iştirakçıları arasında ən yüksək reytinqin təqdim olunması şirkətin müştərilərinin məmnunluğuna və etibarlı təminatına yönəlmiş fəaliyyətini əks etdirir.

Beynəlxalq Sığorta Şirkəti hazırda müştərilərə 32 könüllü və 5 icbarı sığorta növü üzrə xidmət göstərir.

Təsisçisi Azərbaycan Beynəlxalq Bankı olan BSŞ 2002-ci ildən fəaliyyət göstərir. Maliyyə Nazirliyinin məlumatlarına əsasən, 2009-cu ilin yanvar-sentyabr aylarında şirkətin topladığı sığorta haqlarının həcmi 10,06 mln. manat, ödənişləri isə 3,13 mln. manat təşkil edib. Şirkətin ölkə üzrə məcmu sığorta daxilolmalarındakı xüsusi çəkisi 7,7%, ödənişlərdə isə 8,2%-dir.

«APA-Economics»in sığorta şirkətləri üzrə hazırladığı renkinqdə (yanvar-sentyabr ayları üzrə) BSŞ sığorta haqları və ödənişlərə görə müvafiq olaraq beşinci yerdə qərarlaşıb.