Maliyyə

Ana səhifə

Maliyyə

Azərbaycan Beynəlxalq Bankı səhmlərinin nominal dəyərini artırıb

28 oktyabr 2009 12:23 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı (ABB) səhmlərinin nominal dəyərini 20% artıraraq 24 qəpiyə çatdırıb. Bankın baş ofisindən «APA-Economics»ə verilən məlumata görə, bununla bağlı qərar Bankın səhmdarlarının keçirilən növbədənkənar ümumi yığıncağında qəbul edilib.

Maliyyə naziri Samir Şərifovun sədrliyi ilə keçirilən iclasda bankın Müşahidə Şurası və Audit Komitəsinin tərkibinə, həmçinin Bankın 2009-cu ilin III rübünün mənfəətinə dair qərarlar qəbul olunub. Yığıncağın qərarı ilə bankın bu ilin yanvar-sentyabr aylarında əldə etdiyi mənfəətin bir hissəsi - 40 mln. manat ABB-nin səhmlərinin nominal dəyərinin artırılması yolu ilə nizamnamə kapitalına yönəldilib.

Bankdan bildirilib ki, səhmdarlara dividentlərin ödənilməsi məsələsinə isə ilin yekunlarına görə əlavə olaraq baxılacaq.

Xatırladaq ki, Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Cari ilin oktyabr ayının 1-nə bankın aktivlərinin həcmi 4 758,574 mln. manat, depozit portfeli 1 944,185 mln. manat, kredit portfeli 3 596,347 mln. manat, məcmu kapitalı 452,106 mln. manat, o cümlədən nizamnamə kapitalı 200 mln. manat, mənfəəti isə 125,852 mln. manat təşkil edib. Hazırda bankın respublika üzrə 37 filialı, 587 bankomatı və 2 717 POS-terminalı mövcuddur.