Maliyyə

Ana səhifə

Maliyyə

Asiya İnkişaf Bankı TFFP Proqramı çərçivəsində Azərbaycan, Monqolustan və Özbəkistanda fəaliyyətini aktivləşdirir

28 oktyabr 2009 13:24 (UTC +04:00)

Bakı. Nicat Mustafayev – APA-Economics. Asiya İnkişaf Bankının (AİB) özəl sektorun inkişafı üzrə nümayəndələri Ticarətin Maliyyələşdirilməsinə Yardım Proqramı (TFFP) çərçivəsində Azərbaycan, Monqolustan və Özbəkistana səfərlərini başa çatdırıb.
AİB-in Bakı ofisindən «APA-Economics»ə verilən məlumata görə, AİB Azərbaycanda bu proqramın əhatə dairəsini genişləndirməklə daha çox bank cəlb etmək, Monqolustan və Özbəkistanda isə bu proqrama ilk dəfə start verməyi planlaşdırır.
Regiona səfər çərçivəsində AİB nümayəndələri oktyabrın 28-də Azərbaycanda bir neçə bankın yüksək rəsmiləri ilə görüşərək, proqramın mahiyyəti barədə müzakirə aparıblar.
Qeyd edək ki, 2006-2008-ci illər ərzində Azərbaycanın 4 bankı («Access Bank», «AGBank», «Bank of Baku» və «Bank Respublika») bu proqramda iştirakla bağlı müqavilə imzalayıb. İlkin büdcəsi 1 mlrd. ABŞ dolları olan TFFP proqramı ticarətin dəstəklənməsi məqsədi ilə beynəlxalq və üzv ölkələrin bankları ilə əməkdaşlıq etməklə maliyyə və bank təminatı verir.
Xatırladaq ki, 2004-cü ildən icrasına start verilən bu proqramın portfeli revolver tipli olduğundan və özəl sektoru cəlb etdiyindən 2013-cü ilə qədər ticarətin maliyyələşdirilməsinə ümumilikdə 15 mlrd. dollar sərf olunacaq.