Maliyyə

Ana səhifə

Maliyyə

Azərbaycanın qiymətli kağızlar bazarında sadə veksellərin həcmi yanvar-sentyabr aylarında 4 dəfədən çox artıb

03 noyabr 2009 13:53 (UTC +04:00)

Bakı. Nicat Mustafayev – APA-Economics. Bu ilin yanvar-sentyabr ayları ərzində Azərbaycanın qiymətli kağızlar bazarında sadə veksellərin həcmi ötən ilin ilk doqquz ayı ilə müqayisədə 4,4 dəfə artıb.

Qiymətli Kağızlar üzrə Dövlət Komitəsindən «APA-Economics»ə verilən məlumata görə, əgər ötən ilin yanvar-sentyabr aylarında sadə veksellərin həcmi 58,5 mln. manat təşkil edirdisə, cari ilin eyni dövrü ərzində bu rəqəm 259,1 mln. manata çatıb.

Girov və ipoteka kağızlarına gəldikdə isə, hesabat dövründə girovun dövlət qeydiyyatının sayı 49%, girovun əlavə dövlət qeydiyyatının sayı isə 74,8% azalıb. İpoteka kağızının qeydiyyatı 16,8% artaraq 223 ədəd, əlavə qeydiyyatı isə 2,3% azalaraq 209 ədəd təşkil edib.

Bununla yanaşı, hesabat dövründə mənzil sertifikatlarının həcmi, sayı və sahəsi də artıb. Belə ki, ötən ilin müvafiq dövrünə nisbətən mənzil sertifikatlarının sayı 22,4% artaraq 387 ədəd, məbləği 19,6 dəfə artaraq 277,1 mln. manat, buraxılan mənzil sertifikatlarının sahəsi isə 4,5 dəfə artaraq 81 830 kv. metrə çatıb. Emitentlərin sayı isə ötən ilki səviyyədə (3) qalıb.