Maliyyə

Ana səhifə

Maliyyə

Bəzi deputatlar gələn ilin dövlət büdcəsində neftin 1 barelinin qiymətinin 45 dollardan götürülməsinə etiraz edirlər

10 noyabr 2009 16:10 (UTC +04:00)

Bakı. Elbrus Seyfullayev - APA. Milli Məclisin bugünkü iclasında “2010-cu ilin dövlət büdcəsi haqqında” qanun layihəsinin müzakirəsi başlayıb. APA-nın məlumatına görə, hökumət rəsmiləri büdcəni təqdim edəndən sonra millət vəkilləri çıxışlar ediblər.

Milli Məclisin üzvü Cəmil Həsənli büdcədə neftin qiymətinin 45 dollardan hesablanmasının yolverilməz olduğunu bildirib. Onun sözlərinə görə, bu olduqca aşağı rəqəmdir. C. Həsənli digər məsələlərə də toxunub: “Büdcə kəsiri ötənilki ilə müqayisədə, yeddi dəfə artıqdır. Bu çox narahatedicidir. Bundan başqa, kino çəkilişinə büdcədən cəmi 6 milyon manat vəsait ayrılıb. Nəzərinizə çatdırım ki, 6 milyon manata heç jurnal çıxartmaq olmaz”.

Millət vəkili Rəfael Cəbrayılov iri şəhərlərin büdcədən maliyyələşdirilməsinin düzgün olmadığını deyib. Onun sözlərinə görə, böyük şəhərlərdə sənaye inkişaf etdirilməli və onlar özlərini maliyyələşdirmək gücündə olmalıdırlar.

Milli vəkili Nazim Məmmədov deputatların avtomobillə təmin olunmasında mövcud problemlərin aradan qaldırılmasını təklif edib. Deputat, həmçinin təhsil sahəsindəki problemlərin islahatlar yolu ilə aradan qaldırılmasının zəruriliyini diqqətə çatdırıb.

Deputat Zahid Oruc A/H1N1 virusunun yayılması ilə bağlı hökumət komissiyasının yaradılmasını təklif edib. Millət vəkili, həmçinin büdcə ilə bağlı məlumatların kitab halında çap olunmasına ehtiyac görmədiyini deyib: “Bu məlumatları bizə SD-lərdə təqdim etmək olar. On minlərlə manat sərf edib bu kitabları çap etdirməyə ehtiyac yoxdur”.

Deputat Vahid Əhmədov isə neftin qiymətinin 45 yox, 55 dollardan hesablanmasını təklif edib. O, həmçinin büdcə kəsirinin yaranmasından narahat olduğunu deyib: “1 milyard manatdan artıq kəsir var. Vergi ödəyicilərinin büdcəyə olan borcu isə 4 milyarddan artıqdır. Yəqin bir neçə ilə onların borcu büdcəyə bərabər olar. Buna son qoymaq lazımdır. Büdcəyə nəzarət mexanizmi yaradılmalıdır”.

Milli Məclisin spikeri Oqtay Əsədov deputat Nazim Məmmədovun təklifinə cavab verib. Spiker deyib ki, deputatların avtomobil təminatı ilə bağlı problemlər digər ölkələrdə daha qabarıqdır: “MDB ölkələrində bu sahədə ən yaxşı vəziyyətdə olanlardan biri bizik. Heç Belarusda vitse-spikerlərin avtomobili yoxdur. Biz deyirik büdcəyə qənaət edək, siz də maşın istəyirsiniz. Dövlət Milli Məclisə hər cür yardım edir”.

Müzakirələr parlamentin sabahkı iclasında davam etdiriləcək.