Maliyyə

Ana səhifə

Maliyyə

İqtisadi Tədqiqatlar Mərkəzi: Oktyabrda Azərbaycanda 1,16% inflyasiya qeydə alınıb

11 noyabr 2009 10:45 (UTC +04:00)

Bakı. Elnur Hüseynquluyev – APA-Economics. İqtisadi Tədqiqatlar Mərkəzi (İTM) Alternativ inflyasiya səviyyəsinin hesablanması Proqramı çərçivəsində Azərbaycanın 11 regionunda 2009-cu ilin oktyabr ayı ərzində apardığı qiymətlərin statistik müşahidəsinin nəticələrini açıqlayıb.

İTM-dən «APA-Economics»ə verilən məlumata görə, bu ilin oktyabr ayında Azərbaycanda istehlak qiymətləri indeksi (İQİ) 1,16% artıb. Qeyd olunan dövrdə Bakıda qiymətlər 2,15%, regionlarda isə 0,20% artıb. Ay ərzində qeyri-ərzaq məhsullarında 0,26%, xidmətlər üzrə 4,91%, ərzaq məhsullarında isə 0,18% bahalaşma qeydə alınıb.

Oktyabrda ən çox bahalaşma xidmətlər üzrə metroda gediş haqqı (3 dəfə), qeyri-ərzaq məhsulları üzrə tənzif (21,74%), 585 əyarlı qızıl üzük (4,35%), ərzaq məhsulları üzrə isə şəkər tozu (7,44%), günəbaxan yağında (5,34%) müşahidə olunub.

Ən çox ucuzlaşma isə ərzaq məhsullarında alma (15,86%), şabalıd (14,23%), fındıq (9,32%), yer xiyarı (7,15%), heyvada (7,09%) baş verib ki, bu da mövsümi amillərin təsiri ilə izah olunur.

Cari ilin ilk 10 ayında qiymətlər üzrə aparılan statistik müşahidələr göstərib ki, bu dövrdə Azərbaycanda 0,7%-lik deflyasiya baş verib. Bu dövrdə istehlak səbəti üzrə ən yüksək ucuzlaşma (-3,27%) qeyri-ərzaq məhsullarında qeydə alınıb. Hesabat dövründə ərzaq məhsulları 3,22% ucuzlaşıb, xidmətlər isə 9,63% bahalaşıb. Ötən ilin oktyabrı ilə müqayisədə bu ilin oktyabrında Azərbaycanda İQİ 3,58% düşüb. O cümlədən, ərzaq məhsullarında illik deflyasiya 7,74%, qeyri-ərzaq məhsullarında 4,62% təşkil edib. Xidmət sektorunda isə son bir ildə 9,5% bahalaşma müşahidə olunub.

Bundan başqa, Mərkəzinin ekspertləri bu ilin oktyabr ayının qiymətləri və Nazirlər Kabinetinin qərarı ilə təsdiq olunmuş normativlər əsasında istehlak səbətinin dəyərini hesablayıblar. Həmin hesablamalara əsasən, oktyabr ayında Azərbaycanda yaşayış minimumu adambaşına 136,8 manat təşkil edib. O cümlədən, əmək qabiliyyətli əhali üçün adambaşına minimum istehlak səbətinin dəyəri 129,12 manat, pensiyaçılar üçün 119,96 manat, 0-15 yaşlı uşaqlar üçünsə 161,45 manat təşkil edib.

Oktyabr ayında əmək qabiliyyətli əhali adambaşına ərzağa minimum 76,99 manat, pensiyaçılar 72,95 manat, 0-15 yaşlı uşaqların valideynləri isə 89,71 manat xərcləməli olub. Ay ərzində bazardakı qiymətlərlə əhalinin qeyri-ərzaq məhsullarına çəkdiyi minimum xərcləri müvafiq olaraq 27,03 manat, 24,75 manat və 54,27 manat, minimum xidmət haqqı xərcləri isə 25,1 manat, 22,26 manat və 17,47 manat təşkil edib.

Qeyd edək ki, Milli Məclisə təqdim olunmuş 2010-cu ilin büdcə zərfində gələn il üçün yaşayış minimumunun dəyəri adambaşına 87 manat, o cümlədən əmək qabiliyyətli əhali üçün 96 manat, pensiyaçılar üçün 68 manat, uşaqlar üçün isə 72 manat müəyyənləşdirilib.