Maliyyə

Ana səhifə

Maliyyə

Bakıda İpək Yolu ölkələri gömrük idarələri başçılarının toplantısı keçirilir

11 noyabr 2009 10:54 (UTC +04:00)

Bakı. Rəşad Süleymanov – APA-Economics. Bu gün Bakıda İpək Yolu ölkələri arasında ticarətə yardım və onun asanlaşdırılması üzrə gömrük idarələrinin roluna dair II Beynəlxalq Forum işə başlayıb. «APA-Economics»in bildirdiyinə görə, forumda Azərbaycan, Qazaxıstan, Qırğızıstan, İran, Yaponiya, Koreya, Gürcüstan, Monqolustan, Pakistan, Rusiya və Türkiyə gömrük xidməti orqanları məsul şəxsləri iştirak edir. Tədbirə Ümumdünya Gömrük Təşkilatı, Beynəlxalq Yol Daşınmaları İttifaqı, İqtisadi Əməkdaşlıq Təşkilatı, BMT-nin Avropa İqtisadi Komissiyası, Asiya İnkişaf Bankı və TRACECA-nın səlahiyyətli nümayəndələri də qatılıb.

Tədbirin açılışında çıxış edən Azərbaycan baş nazirinin müavini Abid Şərifov 1998-ci ildə TRACECA-nın yaradılması ilə bölgədə daşımaların həcmində ilbəil artım yaranıb. Məsələn, 1995-ci ildə TRACECA-nın Azərbaycan seqmentində cəmi 350 min ton yük daşındığı halda, 2000-ci ildə bu rəqəm 14 mln. ton təşkil edib.

A.Şərifov Azərbaycan gömrük xidmətinin müasir avadanlıqlar və peşəkar kadrlarla təmin olunması sahəsində işlərin həyata keçirildiyini də diqqətə çatdırıb.

TRACECA-nın baş katibi Jantoro Satıbaldiyev üzv ölkələrin ticarət proseduralarının sadələşdirilməsi istiqamətində tədbirlər həyata keçirdiyini vurğulayıb. TRACECA-nın hazırlanmaqda olan uzunmüddətli strategiyasında da bu məsələnin öz əksini tapacağını qeyd edən təşkilat rəhbəri Azərbaycanın gömrük sistemində tətbiq olunmuş «vahid pəncərə» sistemini dəstəklədiklərini vurğulayıb.

Türkiyənin dövlət naziri Həyati Yazıçı isə bildirib ki, İpək Yolu böyük bir coğrafiyanı əhatə edir və bu bölgənin tranzit rolu getdikcə artmaqdadır. Ötən il dünyanın ümumi ticarət dövriyyəsi 32 trln. dollar təşkil edib ki, bunun da 7%-i İpək Yolu coğrafiyasında yerləşən ölkələrin payına düşüb.

«İpək Yolunun böyük potensialı var. Sərhəd keçid proseduralarının asanlaşdırılması, eləcə də hazırda həyata keçirilən tədbirlər gələcəkdə bölgənin tranzit potensialını artıracaq», - deyə nazir H.Yazıçı vurğulayıb.

Azərbaycan Dövlət Gömrük Komitəsinin sədri Aydın Əliyev isə son illər Azərbaycanın gömrük sistemində həyata keçirilən tədbirlər barədə məlumat verib.

Qeyd edək ki, forumun gündəliyinə İpək Yolu ölkələri arasında ticarətin asanlaşdırılmasında ÜGT-nin rolu, ticarətin asanlaşdırılması alətləri – «bir pəncərə», malların sərhəddən keçirilməsinin asanlaşdırılmasında Yaponiya təcrübəsi, Pakistan gömrüyü və quru yollarla aparılan ticarət, Türkiyə sərhəd buraxılış məntəqələrinin müasirləşdirilməsi, İpək Yolunun bərpası perspektivləri, Rusiya gömrük xidmətinin strateji inkişafının əsas istiqamətləri, İƏT regionunda tranzitin sadələşdirilməsi, İpək Yolu üzərində beynəlxalq ticarətin, yol nəqliyyatının təhlükəsizliyi və asanlaşdırılması üçün BYD sistemi və digər mövzularda çıxışlar daxildir.

Forumun yekununda isə Bakı Bəyannaməsinin qəbulu nəzərdə tutulub.