Maliyyə

Ana səhifə

Maliyyə

Azərbaycandakı bankların aktivlər üzrə renkinqi

11 noyabr 2009 12:41 (UTC +04:00)

Bakı. Elnur Hüseynquluyev – APA-Economics. Bu gündən etibarən «APA-Economics» Azərbaycanda fəaliyyət göstərən bank kredit təşkilatlarının 2009-cu ilin oktyabr ayının 1-nə müxtəlif maliyyə göstəriciləri üzrə renkinqlərinin hazırlanmasına başlayır.

Layihənin əsas məqsədi Azərbaycandakı bankların maliyyə-təsərrüfat fəaliyyəti və onun nəticələri haqqında ictimaiyyətin və potensial investorların məlumatlandırılmasıdır.

Layihənin ilk komponenti bankların aktivlər üzrə renkinqinin tərtib olunmasıdır. Aşağıdakı cədvəldə ölkədəki banklar 2009-cu il oktyabr ayının 1-nə olan aktivlərin həcminə görə sıralanıb:

(mln. AZN)

Banklar		Aktivlər
1	Azərbaycan Beynəlxalq Bankı	4 758,574
2	Bank Standard	517,655
3	Texnika Bank	449,996
4	Kapital Bank	449,217
5	Xalg Bank	441,520
6	Bank Respublika	364,472
7	UniBank	345,043
8	AccessBank	270,313
9	DəmirBank	251,011
10	Paşa Bank	250,040
11	AGBank	227,339
12	Nikoil Bank	218,097
13	AtaBank	188,685
14	Bank of Baku	179,299
15	Zamin Bank	162,066
16	Bank of Azerbaijan	144,531
17	YapıKredi Bank Azerbaijan	138,469
18	Royal Bank	135,555
19	Muğan Bank	130,618
20	Azərbaycan Sənaye Bankı	107,664
21	Turan Bank	101,30
22	Rabitabank	86,136
23	Parabank	74,457
24	Əmrahbank	63,094
25	Kredo Bank	57,913
26	Birlik Bank	51,552
27	Azər-Türk Bank	49,706
28	NBCBank	49,258
29	Azərnəqliyyatbank	49,127
30	Gəncəbank	36,433
31	Bank Avrasiya	36,104
32	Qafqaz İnkişaf Bankı	35,302
33	Atrabank	34,768
34	United Credit Bank	34,527
35	Günaybank	31,910
36	Deka Bank	31,828
37	Melli İran Bankı - Bakı	30,731
38	Azərbaycan Kredit Bankı	27,395
39	Kövsər Bank	17,336

Cədvəldən göründüyü kimi, hazırda Azərbaycanda faktiki olaraq 46 bank kredit təşkilatı fəaliyyət göstərsə də, «APA-Economics»in renkinqində yalnız 39 bankın aktivləri əks olunub. Bu, digər bankların KİV-lə əməkdaşlıqdan imtina etməsi, maliyyə göstəricilərini təqdim etməməsi və digər subyektiv səbəblərlə bağlıdır.

Aktivlərin renkinqinə gəldikdə isə, gözlənildiyi kimi, ilk yeri Azərbaycan və regionun ən iri bank təşkilatı olan Azərbaycan Beynəlxalq Bankı (ABB) tutub. Əsasən dövlət mülkiyyətində (50,2%) olan bu bankın aktivlərinin durmadan artması bankın inkişafı, filial şəbəkəsinin geniş olması, əsas dövlət qurumlarına xidmət göstərməsi və s. obyektiv səbəblərlə əsaslandırılır. Bu gün Azərbaycanda yalnız ABB-nin aktivlərinin həcmi milyard manatla (təqribən 5,923 mlrd. ABŞ dolları) ölçülür.

Cədvəldən göründüyü kimi, yalnız 12 bankın aktivlərinin həcmi 200 mln. manat (01.10.2009-cu il vəziyyətinə - 248,942 mln. ABŞ dolları), 21 bankın aktivləri - 100 mln. manat həddini (124,471 mln. ABŞ dolları), daha 5 bankın aktivlərinin həcmi isə 50 mln. manat (62,235 mln. ABŞ dolları) həddini üstələyib.