Maliyyə

Ana səhifə

Maliyyə

«Bank of Azerbaijan» strateji investor cəlb etməyə hazırlaşır

18 yanvar 2010 10:52 (UTC +04:00)

Bakı. Elnur Hüseynquluyev – APA-Economics. «Bank of Azerbaijan» Səhmdar Kommersiya Bankı (SKB) yaxın perspektivdə səhmdar kapiatalının formalaşması prosesinə strateji investor cəlb etmək niyyətindədir. Bu barədə «APA-Economics»ə bankın İdarə Heyətinin sədri Xəyal Şərifzadə məlumat verib.

X.Şərifzadənin sözlərinə görə, strateji investorun xarici maliyyə qurumu olacağı, hətta bir neçə investorun cəlb ediləcəyi istisna olunmur. «Cəlb edilən investorun beynəlxalq maliyyə institutu olacağı planlaşdırılır. Lakin onlara bankımızın nizamnamə kapitalında maksimum «25%+1 səhm» paketi həcmində iştirak payı verilə bilər», - deyə «Bank of Azerbaijan»ın başçısı vurğulayıb.

Artıq bu istiqamətdə danışıqların aparıldığını bildirən X.Şərifzadə məsələnin hətta 2010-cu ildə reallaşmasını mümkün sayır. Prosesin ləngiməsini isə bankın sədri dünya maliyyə böhranı ilə əlaqədar əksər xarici investorların əsas diqqətini cari problemlərin həllinə yönəltməsi, həm də «Bank of Azerbaijan»ın hazırkı mərhələdə kapitallaşmanın öz imkanları hesabına artırılması ilə bağlı tədbirləri uğurla davam etdirməsi ilə əlaqələndirib.

Xatırladaq ki, Fransanın «Societe Generale» bankının «Bank of Azerbaijan» SKB-nin nizamnamə kapitalında iştirak payının alınmasına dair tərəflər arasında aparılan danışıqlar 2008-ci ildə dayandırılıb. «Societe Generale»in «Bank of Azerbaijan»ın hazırkı maliyyə göstəricilərinin qənaətbəxşliyini və inkişaf potensialını nəzərə alaraq, Azərbaycan bankında nəzarət səhm paketini almaq istəyib. Lakin Azərbaycan tərəfində Fransa bankını nizamnamə kapitalına yalnız strateji investor qismində cəlb etmək istəyi olub və danışıqlar «Bank of Azerbaijan»ın təşəbbüsü ilə dayandırılıb.

Qeyd edək ki, səhmdarları «NEM Holding» və 2 fiziki şəxs olan «Bank of Azerbaijan» SKB 1993-cü ildən fəaliyyət göstərir. Cari ilin yanvar ayının 1-nə bankın aktivlərinin həcmi 144 mln. manat, nizamnamə kapitalı isə 15 mln. manat təşkil edib. Hazırda bankın respublika üzrə 12 filialı fəaliyyət göstərir.