Maliyyə

Ana səhifə

Maliyyə

Bu il Azərbaycanda pensiya xərclərinin strukturunda sığorta hissəsinin xüsusi çəkisi 30%-i üstələyəcək

19 yanvar 2010 09:42 (UTC +04:00)

Bakı. Aynur Vəliyeva - APA-Economics. Azərbaycan Dövlət Sosial Müdafiə Fondunun (DSMF) xərcləri 2009-cu ildə 1 675,0 mln. manat təşkil edib. «APA-Economics»in məlumatına görə, bunu DSMF-nin sədri Səlim Müslümov bildirib.

S.Müslümov qeyd edib ki, xərclərin 96,6%-i və ya 1 618,0 mln. manatı əhaliyə ödənişlərə yönəldilib, bu isə 2008-ci ilə nisbətən 20,8% və ya 278 mln. manat çoxdur. Məcmu xərclərin 94%-ni pensiya ödəmələri təşkil edib. Bundan əlavə, 2009-cu ildə əhaliyə 46,4 mln. manat və ya əvvəlki ilə nisbətən 24,6% çox müavinət verilib.

«Xərclərin bu artımları inflyasiyanın yalnız 1,5% olduğu şəraitdə baş verib və əhalinin bilavasitə real gəlirlərini artırıb. Əgər 2008-ci ildə əhalinin pul gəlirlərində fondun ödəmələri 6,7% olubsa, 2009-cu ildə bu göstərici 7,2%-dək yüksəlib», - deyə S.Müslümov bildirib.

Fondun sədrinin sözlərinə görə, pensiya ödənişlərinin artım tempi əhalinin pul gəlirlərinin ümumi artımını 9,1 bənd üstələyib. Bu isə Azərbaycan əhalisinin aztəminatlı təbəqəsinin gəlirlərinin dövlət tərəfindən xüsusi dəstəklənməsinin birbaşa təsdiqidir.

«Diqqəti cəlb edən məsələlərdən biri pensiya xərclərinin tərkibində sığorta hissəsinin xüsusi çəkisinin ilbəil artmasıdır ki, bu göstərici yeni sistemə keçildiyi 2006-cı ildəki 20,8%-dən 2009-cu ildə 28,7%-dək yüksəlib, 2010-cu ildə isə onun 30,3%-dək artacağı gözlənilir», - deyə DSMF başçısı vurğulayıb.