Maliyyə

Ana səhifə

Maliyyə

«Bank Respublika»nın aktivləri ötən il 10% azalıb

21 yanvar 2010 10:54 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» ASC-nin aktivlərinin həcmi 2010-cu ilin yanvar ayının 1-nə 347,9 mln. manat təşkil edib ki, bu da 2009-cu ilin əvvəlinə nisbətən 10,3% azdır.

Bankın baş ofisindən «APA-Economics»ə verilən məlumata görə, aktivlərin azalması kreditləşmə və risklərin idarə edilməsi siyəsətinin konservativliyi ilə əlaqədar kredit portfelinin qalığının (196,6 mln. manat) azalması ilə bağlıdır. Aktivlərin strukturunda bankın kredit portfelinin (196,6 mln. manat) payı 56,5% təşkil edib.

Hesabat ilində bankın müştəri hesablarında olan vəsaitləri 19,5% artaraq 162,3 mln. manata, fiziki şəxslərin əmanətləri 41% artaraq 112 mln. manata çatıb. Bununla yanaşı hesabat dövrünə əhalinin əmanətləri 47,3% artaraq 94,5 mln. manat təşkil edib.

İl ərzində bankın məcmu kapitalı 28,2% artaraq 55,5 mln. manata, o cümlədən nizamnamə kapitalı 35,4% artaraq 30,6 mln. manata çatıb.

Qeyd edək ki, ötən il ərzində bankın gəlirləri 54,9 mln. manat, xərcləri isə 46,9 mln. manat olub. Nəticədə, hesabat dövrünə bankın balans mənfəəti 8 mln. manat təşkil edib.

Xatırladaq ki, «Bank Respublika» ASC 1992-ci ildən fəaliyyət göstərir. Bankın səhmdarları rolunda nizamnamə kapitalında «25% + 1 səhm» paya malik olan Almaniyanın DEG İnvestisiya Şirkəti və «Sparkassen International Development Trust» şirkəti də var. Hazırda bankın respublika üzrə 34 filial və şöbəsi mövcuddur.