Maliyyə

Ana səhifə

Maliyyə

«DəmirBank» ötən il depozit portfelini 46% genişləndirib

21 yanvar 2010 11:51 (UTC +04:00)

Bakı. Elnur Hüseynquluyev – APA-Economics. «DəmirBank» ASC-nin aktivlərinin həcmi 2010-cu ilin yanvar ayının 1-nə 266,034 mln. manat təşkil edib ki, bu da 2008-ci ilin yekunlarına nisbətən 16,4% çoxdur.

Bankın baş ofisindən «APA-Economics»ə verilən məlumata görə, hesabat ilində bankın depozit portfeli 45,6% genişlənərək 95,247 mln. manat, kredit portfeli 18% artaraq 198,989 mln. manat, o cümlədən istehlak kreditlərinin həcmi 11,8% azalaraq 61,655 mln. manat olub. Hesabat dövründə bankın məcmu kapitalı 27,8% artaraq 46,587 mln. manat, o cümlədən nizamnamə kapitalı 37,3% artaraq 18,400 mln. manat təşkil edib.

Qeyd edək ki, bankın ümumi gəlirləri 2008-ci ilin yekunu ilə müqayisədə 19,5% azalaraq 53,645 mln. manat, xərcləri isə 13,6% azalaraq 48,372 mln. manat olub. Nəticədə, bankın mənfəəti son bir il ərzində 50% azalaraq 5,274 mln. manat təşkil edib.

Həmçinin, bu dövr ərzində bank əlavə 2 filial açıb, 8 bankomat və 7 POS-terminal quraşdırıb. Bununla yanaşı, bankın müştərilərinin sayı 2,5% artaraq 42 621 nəfərə, işçilərinin sayı 14,3% artaraq 583 nəfərə çatıb.

Xatırladaq ki, «DəmirBank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir. Cari ilin yanvar ayıın 1-nə bankın 29 filialı, 47 bankomatı və 259 POS-terminalı mövcuddur.