Maliyyə

Ana səhifə

Maliyyə

«Muğan Bank» ötən il aktivlərini 50% artırıb

25 yanvar 2010 06:56 (UTC +04:00)

Bakı. Elnur Hüseynquluyev – APA-Economics. Azərbaycanın «Muğan Bank» ASC-nin aktivlərinin həcmi 2010-cu ilin yanvar ayının 1-nə 150,429 mln. manat təşkil edib ki, bu da 2009-cu ilin əvvəli ilə müqayisədə 49,3% çoxdur.

Bankın baş ofisindən «APA-Economics»ə verilən məlumata görə, hesabat ilində bankın depozit portfeli 60,3% genişlənərək 58,707 mln. manata, kredit portfeli 50,6% artaraq 99,976 mln. manata, o cümlədən istehlak kreditlərinin həcmi 53,8% artaraq 39,488 mln. manata çatıb. Bu müddət ərzində bankın məcmu kapitalı 47% artaraq 21,861 mln. manat, o cümlədən nizamnamə kapitalı 58,3% artaraq 19 mln. manat olub.

Qeyd edək ki, son bir ildə bankın gəlirləri 9,6% artaraq 15,695 mln. manat, xərcləri isə 16,2% artaraq 15,231 mln. manat təşkil edib. Nəticədə, bankın mənfəəti son bir ildə 61,8% azalaraq 0,463 mln. manata düşüb.

Bu dövr ərzində bank tərəfindən əlavə 3 filial açılıb, 9 bankomat və 7 POS-terminal quraşdırılıb. Cari ilin yanvar ayının 1-nə bankın müştərilərinin sayı 39,6% artaraq 33 115 nəfərə çatıb, işçilərinin sayı isə 417 nəfər olub ki, bu da ötən ilin əvvəlinə nisbətən 49,5% çoxdur.

Xatırladaq ki, təsisçisi dörd fiziki şəxs olan «Muğan Bank» ASC 1992-ci ildən fəaliyyət göstərir. Bankın respublika üzrə 27 filialı, 30 bankomatı və 69 POS-terminalı mövcuddur.