Maliyyə

Ana səhifə

Maliyyə

«Bank of Baku»nun depozit portfeli ötən il 17% artıb

26 yanvar 2010 07:24 (UTC +04:00)

Bakı. Elnur Hüseynquluyev – APA-Economics. Azərbaycanın «Bank of Baku» ASC-nin aktivlərinin həcmi 2010-cu ilin yanvar ayının 1-nə 187,396 mln. manat təşkil edib ki, bu da 2009-ci ilin yanvarın 1-nə olan göstəricidən 1,9% çoxdur.

Bankın baş ofisindən «APA-Economics»ə verilən məlumata görə, hesabat ilində bankın depozit portfeli 16,5% artaraq 94,245 mln. manat, kredit portfeli 3,7% azalaraq 129,246 mln. manat, o cümlədən istehlak kreditlərinin həcmi 2,5% artaraq 99,073 mln. manat olub. Bu müddət ərzində bankın məcmu kapitalı 28,7% artaraq 32,863 mln. manat, o cümlədən nizamnamə kapitalı sabit qalaraq 6,8 mln. manat təşkil edib.

Qeyd edək ki, 2009-cu il ərzində bankın gəlirləri 7,2% azalaraq 38,149 mln. manata, xərcləri isə 5,1% artaraq 31,999 mln. manata çatıb. Nəticədə, son bir il ərzində bankın mənfəəti 42,2% azalaraq 6,149 mln. manat təşkil edib.

Xatırladaq ki, «Bank of Baku» SKB 1994-cü ilin fevral ayında «Tuqay Bank» adı ilə fəaliyyətə başlayıb. Bankın təsisçiləri rolunda Türkiyənin «NAB Dış Ticarət» şirkəti və bir neçə fiziki şəxs çıxış edir. Cari ilin yanvar ayının 1-nə bankın ölkə üzrə 15 filialı, 26 bankomatı və 204 POS-terminalı mövcuddur.