Maliyyə

Ana səhifə

Maliyyə

Ötən il Azərbaycanda korporativ qiymətli kağızlar bazarının həcmi 10% artıb

26 yanvar 2010 07:32 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanın korporativ qiymətli kağızlar bazarının həcmi 2008-ci illə müqayisədə 10,3% artaraq 457,3 mln. manat təşkil edib.

Qiymətli Kağızlar üzrə Dövlət Komitəsindən «APA-Economics»ə verilən məlumta görə, hesabat ilində səhmlər üzrə 6,7% azalma müşahidə olunub və nəticədə, səhmlər üzrə qeydə alınan əqdlərin ümumi həcmi 342,4 mln. manat təşkil edib. Buna baxmayaraq, səhmlərin ilkin yerləşdirilməsində 2008-ci illə müqayisədə 13,2% artım olub və bu növ kağızların ilkin yerləşdirilməsinin 2009-cu ildə həcmi 196,6 mln. manat təşkil edib.

Bununla yanaşı, Bakı Fond Birjası (BFB) vasitəsilə səhmlərin təkrar yerləşdirilməsində kəskin artım, birjadankənar səhmlərin təkrar yerləşdirilməsində isə azalma müşahidə olunub. Belə ki, BFB vasitəsilə səhmlərin təkrar yerləşdirilməsi 2008-ci illə müqayisədə 2,3 dəfə artıb, birjadankənar yerləşdirmənin həcmi isə 40,6% azalıb. Nəticədə, BFB vasitəsilə səhmlərin təkrar bazarının həcmi 41,9 mln. manat, birjadankənar səhmlərin təkrar yerləşdirilməsinin həcmi isə 103,8 mln. manat təşkil edib.

Korporativ istiqrazlara gəldikdə isə, 2009-cu ildə bu növ kağızlar üzrə qeydə alınan əqdlərin həcmi 2008-ci illə müqayisədə 2,4 dəfə artaraq 114,8 mln. manat təşkil edib. Korporativ istiqrazların manatla ilkin yerləşdirilməsi 2008-ci illə müqayisədə 95,3% artıb və 50,6 mln. manat, ABŞ dolları ilə ilkin yerləşdirilməsi isə 62,5% azalarıq 2,4 mln. manat təşkil edib. Korporativ istiqrazların manatla təkrar yerləşdirilməsində isə ötən il kəskin artım müşahidə olunub. Belə ki, birja vasitəsilə bu növ kağızların yerləşdirilməsinin həcmi 28 dəfə artaraq 61,3 mln. manata, birjadankənar yerləşdirmənin həcmi isə 6,6 dəfə artaraq 195 min manata çatıb. ABŞ dolları ilə korporativ istiqrazların təkrar yerləşdirilməsində 2009-cu ildə kəskin azalma olub. Nəticədə, bu növ kağızların təkrar yerləşdirilməsi 32,6 dəfə azalaraq 403 min manat təşkil edib.