Maliyyə

Ana səhifə

Maliyyə

Azərbaycanda dövlət qiymətli kağızlar bazarı kəskin azalıb

26 yanvar 2010 08:46 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanın dövlət qiymətli kağızlar bazarında 2008-ci illə müqayisədə qeydə alınan əməliyyatların həcmi 3,2 dəfə azalaraq 2 969,896 mln. manat təşkil edib, əqdlərin sayı isə 2,4 dəfə azalıb.

Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, azalmanın əsas səbəbi Azərbaycan Mərkəzi Bankının (AMB) iqtisadiyyatda likvidliyi artırmaq məqsədilə pul siyasətini yumşaltması nəticəsində sterilizasiya aləti olan notların emissiyasını azaltması olub. Belə ki, hesabat ilində notlar üzrə aparılan əməliyyatların həcmi 5,9 dəfə azalaraq 354,727 mln. manat təşkil edib, qeydə alınan əqdlərin sayı isə 4,9 dəfə azalıb. Notların ilkin yerləşdirilməsi üzrə aparılan əməliyyatların həcmi 2008-ci ilə nisbətən 5,7 dəfə azalaraq 287,222 mln. manat, təkrar yerləşdirilməsi üzrə isə 6,7 dəfə azalaraq 67,509 mln. manat təşkil edib.

Dövlət istiqrazlarına gəldikdə isə, hesabat ilində bu alət üzrə qeydə alınan əməliyyatların həcmi 55% artaraq 661,087 mln. manat təşkil edib. O cümlədən, dövlət istiqrazlarının ilkin yerləşdirilməsi üzrə əməliyyatların həcmi 68,4% artaraq 503,008 mln. manata, təkrar yerləşdirilməsi üzrə isə 23,3% artaraq 158,079 mln. manata çatıb.

Bununla yanaşı, 2009-cu ildə repo və əks-repo üzrə əməliyyatların həcmində də azalma müşahidə olunub. Belə ki, bu qiymətli kağızlar üzrə əməliyyatların həcmi 2008-ci illə müqayisədə 3,5 dəfə azalaraq 1 954,082 mln. manat təşkil edib.