Maliyyə

Ana səhifə

Maliyyə

Etibar Əliyev: «Texnikabank» 2010-cu ildə də kreditləşmə siyasətini inamla davam etdirəcək»

26 yanvar 2010 13:31 (UTC +04:00)

Bakı. Rəşad Süleymanov – APA-Economics. «Texnikabank» ASC 2009-cu ildə Azərbaycan kapital bazarında ilk dəfə tədavüldəki qiymətli kagızları birinci səviyyəli kotirovka vərəqəsinə daxil edilən təsərrüfat subyekti olub. «APA-Economics»in məlumatına görə, bunu «Azərbaycan» qəzetində dərc olunmuş məqaləsində «Texnikabank»ın Müşahidə Şurasının sədri Etibar Əliyev bildirib.

E.Əliyev qeyd edib ki, 2009-cu ildə «Texnikabank»ın başlıca hədəfləri yüksək likvidliyin təmini, institusional inkişafın davam etdirilməsi, risklərin idarə olunması sisteminin təkmilləşdirilməsi, cəlb olunmuş vəsaitlərin geniş diversifikasiyası olub. Bank məqsədyönlü kreditləşmə siyasəti həyata keçirib, hər bir riski ciddiliklə nəzərə alıb, real sektorun maliyyə resurslarına ehtiyaclarını təmin etməyə çalışıb, ipoteka kreditləşməsini uğurla həyata keçirib. Bankın risk menecmenti real sektorun tələblərini öyrənib, müvafiq qiymətləndirmə işi aparıb, yaranan çətinlikləri maliyyə resursları hesabına həll etməyə çalışıb.

«Hazırda bankın öhdəliklərində xarici borcların xüsusi çəkisi 4% təşkil edir ki, bu da son dərəcə yaxşı göstəricidir. Yerli vəsaitlər üç mənbə - əhalinin əmanətləri, dövlət vəsaitləri və nəhayət, korporativ müştərilərin depozitləri hesabına təmin olunur. Bu üç mənbə, eyni zamanda, xarici borclanma hesabına formalaşdırdığımız maliyyə vəsaitləri «Texnikabank»a kreditləşmə siyasətini 2010-cu ildə də inamla davam etdirmək imkanı yaradıb», - deyə məqalədə qeyd olunub.

E.Əliyev qeyd edib ki, 2009-cu ildə maliyyə böhranının dərinləşməsinə baxmayaraq, bank öz aktivlərinin həcmini qoruyub saxlaya bilib. Eyni zamanda 17 mln. manat artıma (5%) nail olub. Bununla bərabər, aktivlərin keyfiyyətində də irəliləyiş baş verib. Ötən il aparılan kreditləşmədə korporativ müştərilərə verilən kreditlərin payı 70%-dən çox olub.

Bank rəhbəri onu da qeyd edib ki, hesabat dövründə bank real sektorun kreditləşdirilməsini uğurla davam etdirib, bu istiqamətdə 16 mln. manatdan çox vəsait yönəldilib. Ümumilikdə, bankın müştərilərə verilmiş kredit portfelinin həcmi 360 mln. manata, əhalinin əmanətləri 15% (12 mln. manat) artaraq 94 mln. manata çatıb. İl ərzində bankın gəlirləri 69 mln. manat, məsrəfləri isə 12,7 mln. manat təşkil edib.

«Səhmdarların qərarı ilə cari ilin məsrəflərinin kapitala yönəldilməsi qərara alınıb. Bundan əlavə, ötən il bankın 4 törəmə müəssisəsinin (sığorta, lizinq, qiymətli kağızlar bazarı, prosesinq) inkişafına 4 mln. manat vəsait yönəldilib», - deyə E.Əliyev qeyd edib.

Bank rəhbəri onu da vurğulayıb ki, «Texnikabank» ötən il filialları üçün inzibati binaların tikintisinə, habelə mövcud filial və şöbələrin ən müasir tələblərə cavab verən inventar, kompüter və rabitə-informasiya avadanlıqları ilə təchizat məsələlərinə 7-10 mln. manatdan artıq investisiya yönəldib.