Maliyyə

Ana səhifə

Maliyyə

Azərbaycanda Korporativ İdarəetmə Standartlarının ilk variantı geniş müzakirəyə çıxarılıb

02 fevral 2010 09:57 (UTC +04:00)

Bakı. Nicat Mustafayev – APA-Economics. Bu gün Bakıda Beynəlxalq Maliyyə Korporasiyası (IFC) Azərbaycanda Korporativ İdarəetmə Standartlarının layihəsini biznes dairələrinin nümayəndələri və elm xadimlərinin müzakirəsinə çıxarıb.

«APA-Economics»in məlumatna görə, bununla bağlı keçirilən tədbirdə qeyd olunub ki, Azərbaycan İqtisadi İnkişaf Nazirliyinin təşəbbüsü ilə yaradılmış Korporativ İdarəetməyə dair İşçi Qrupu tərəfindən Azərbaycan Korporativ İdarəetmə Standartlarının layihəsi hazırlanıb və IFC nümayəndələri də İşçi Qrupunun fəaliyyətində və Standartların hazırlanmasında iştirak edib: «Bu ayın sonunadək maraqlı tərəflərin rəy və təklifləri qəbul olunacaq, daha sonra Standartlara yenidən baxılacaq. Stardartların tətbiqinə isə 2010-cu ilin ilk yarısı ərzində başlanacağı gözlənilir».

Ölkədə fəaliyyət göstərən şirkətlər Standartlara könüllü şəkildə riayət edə biləcək. Riayət etməyən şirkət isə imtinanın səbəblərini izah etməli olacaq ki, bu da vacibdir: «Təcrübə göstərir ki, analoji standartlar tətbiq olunan ölkələrdə Korporativ İdarəetmənin səmərəliliyi daha böyükdür. Bir sıra ölkədə Standartlar yalnız listinqə daxil edilmiş şirkətlərə şamil olunsa da, Azərbaycanda Standartlara bütün müəssisələr riayət edə biləcək».

Tədbirdə çıxış edən Azərbaycan Korporativ İdarəetmə Layihəsinin rəhbəri xanım Karolina Brayt Standartların vacibliyindən danışıb və qeyd edib ki, Standartlar şirkətlərə bir çox fayda gətirəcək. Belə ki, Standartlara riayət edən müəssisələrdə aktivlərin düzgün bölüşdürülməsi, kapital üzrə xərclərin azaldılması, xarici vəsaitin cəlb olunması və bu kimi müsbət hallar müşahidə olunacaq: «Azərbaycan Korporativ İdarəetmə Layihəsi çərçivəsində layihədə iştirak edən yerli şirkətlər 100 mln. ABŞ dolları məbləğində vəsait cəlb edə bilib ki, bu da çox yaxşı göstəricidir».

Tədbirdə çıxış edən İqtisadi İnkişaf Nazirliyinin nümayəndəsi, İşçi Qrupunun rəhbəri Anar Hacızadə isə öz növbəsində Standartların fəsillərindən danışıb və qeyd edib ki, sənəd altı fəsildən ibarətdir: «Birinci fəsil Müşahidə Şurasına, ikinci fəsil menecmentə, üçüncü fəsil maliyyə hesabatı və şəffaflıq, dördüncü və beşinci fəsillər səhmdarlara, altıncı fəsil isə xüsusi məsələlərə həsr olunub».

Standartın hər hansı bir dövlət qurumu tərəfindən təsdiqinə gəldikdə isə, A.Hacızadə qeyd edib ki, beynəlxalq təcrübəyə əsasən, bunun hər hansı bir qurum tərəfindən həyata keçirilməsi mümkün olduğu kimi, buna ciddi tələbat da yoxdur: «Bir çox ölkədə Standartlar müxtəlif dövlət qurumları tərəfindən təsdiq olunur. Azərbaycanda da bu sənəd müxtəlif qurum tərəfindən təsdiq edilə bilər».

Qeyd edək ki, Azərbaycan Korporativ İdarəetmə Standartları yerli şirkətlərin idarəetmə ilə bağlı üzləşdiyi problemlərin həllinə dair zəruri vasitə və mexanizmləri əhatə edərək, səhmdarların hüquqlarının qorunması, idarəetmə orqanları arasında tarazlığın yaradılması, şəffaflığın təmin olunması və bu kimi digər qabaqcıl korporativ idarəetmə prinsiplərini özündə əks etdirir. Könüllü xarakter daşıyan bu Standartlar korporativ idarəetmə sahəsində mövcud qanunvericiliklə tənzimlənməyən münasibətlərə aydınlıq gətirir və qabaqcıl təcrübənin Azərbaycanda tətbiqinə xidmət edir.