Maliyyə

Ana səhifə

Maliyyə

Bu gündən Azərbaycanda beynəlxalq və milli mühasibat uçotu standartlarına keçidlə bağlı təlimlərə başlanılır

02 fevral 2010 13:15 (UTC +04:00)

Bakı. Nicat Mustafayev – APA-Economics. Bu gündən etibarən Azərbaycanda beynəlxalq və milli mühasibat uçotu standartlarına keçidlə əlaqədar təlimlərə start verilib.

Maliyyə Nazirliyindən «APA-Economics»ə verilən məlumata görə, bu ilin yanvarın 21-də Maliyyə və Təhsil nazirliklərinin müvafiq birqə əmrləri ilə «Beynəlxalq və milli mühasibat uçotu standartlarına keçidlə əlaqədar 2010-2012-ci illərdə ali və orta ixtisas müəssisələrində mühasibat uçotu və audit üzrə tədrisin yenidən təşkilinə və tədrisin peşəkarlıq səviyyəsini təsdiq edən sertifikatlaşdırma sisteminin tətbiq edilməsinə dair Tədbirlər Planı» təsdiq edilib. Tədbirlər Planına əsasən, fevralın 2-dən 12-dək təlimçilər (müəllimlər) üçün təlimlərin keçirilməsi nəzərdə tutulur. Təlimlərdə Azərbaycan Dövlət İqtisad Universiteti, Azərbaycan Dövlət Aqrar Universiteti, Naxçıvan Dövlət Universiteti, Sumqayıt Dövlət Universiteti, Azərbaycan Kooperasiya Universiteti, Xəzər Universiteti, Bakı Biznes Universiteti, Azərbaycan Əmək və Sosial Münasibətlər Akademiyasını təmsil edən 20-ə yaxın təlimçinin iştirak edəcəyi gözlənilir. Təlimlər audit və məsləhət xidmətləri sahəsində dünyanın məşhur şirkətləri sırasında qabaqcıl yerlərdən birini tutan «PricewaterhouseCoopers Azerbaijan» şirkəti tərəfindən aparılacaq.

Təlimlərin Azərbaycan hökuməti və Dünya Bankının birgə maliyyələşdirdiyi Korporativ və Büdcə Sektorunda Hesabatlılıq Layihəsinin vəsaitləri hesabına maliyyələşdirilməsi nəzərdə tutulur. Ümumi dəyəri 24 mln. ABŞ dolları olan layihənin digər donorları Yaponiya höküməti və İsveçrənin İqtisadi Məsələlər üzrə Dövlət Katibliyidir (SECO).