Maliyyə

Ana səhifə

Maliyyə

Şimali Koreya Dövlət Plan Komitəsinin sədri istefaya göndərilib

03 fevral 2010 08:34 (UTC +04:00)

Bakı – APA-Economics. Şimali Koreyanın Dövlət Plan Komitəsinin sədri Pak Nam Ki istefaya göndərilib. Buna ölkədə aparılan uğursuz pul islahatı səbəb olub.

“APA-Economics”in AFP-yə istinadən məlumatına görə, bu barədə Cənubi Koreya Milli Kəşfiyyat Xidmətindən bildirilib.

Məlumata görə, Pak Nam Ki bu il yanvarın əvvəlindən heç bir rəsmi tədbirdə görünmür: “Amma biz əminliklə deyə bilmərik ki, bu, onun istefaya göndərilməsi ilə bağlıdır”.

Cənubi Koreyanın “Yonhap” agentliyi isə Çinin Şimali Koreya ilə həmsərhəd rayonlarındakı mənbələrə istinadən məlumat yayıb ki, Pak Nam Ki nəinki istefaya göndərilib, həm də bu yaxınlarda məhkəmə qarşısında duracaq.

Qeyd edək ki, Pak Nam Ki 2009-cu il noyabrın sonu-dekabrın əvvəlində Şimali Koreyada həyata keçirilən pul islahatının ideoloqu sayılır. Bir həftə ərzində aparılan denominasiya nəticəsində 100 köhnə Koreya vonu bir yeni əsginasa dəyişdirilib. Bir ailəyə yalnız 100-450 min von (35-140 dollar) dəyişdirmək icazəsi verilib.

Qərb ekspertlərinin fikrincə, pul islahatı dövlətin iqtisadiyyat üzərində nəzarətini gücləndirməli, qiymət artımını dayandırmalı idi. Lakin islahatdan sonra Şimali Koreyadan kəskin inflyasiya və zəruri tələbat mallarının qıtlığı haqda informasiyalar gəlməyə başlayıb, əhalinin bəzi təbəqələri aclıq həddinə çatıb. Hətta qəzəbli kütlələrin bazarlarda patrul xidməti həyata keçirən hüquq-mühafizə orqanlarının əməkdaşlarına hücum faktları da qeydə alınıb.

Şimali Koreya rəhbərliyinin pul islahatının ideoloqunu qurban verməsi haqda xəbərlər bu səbəbdən təəccüblü görünmür.