Maliyyə

Ana səhifə

Maliyyə

Asiya İnkişaf Bankının energetika missiyası Azərbaycana gələcək

12 fevral 2010 07:39 (UTC +04:00)

Bakı. Nicat Mustafayev – APA-Economics. Bu ilin fevralın 15-də Asiya İnkişaf Bankının (AİB) energetika sahəsi üzrə məsləhətçisi xanım Kleo Kavavaki Azərbaycana səfər edəcək.

AİB-in Bakı ofisindən «APA-Economics»ə verilən məlumata görə, fevralın 19-dək davam edəcək səfər çərçivəsində K.Kavavaki «Azərenerji» ASC-də görüşlər keçirəcək, ölkədə AİB-in vəsaiti hesabına həyata keçirilən «Elektrik enerjisinin ötürülməsi sisteminin yaxşılaşdırılması Layihəsi» (Power Transmission Enhancement Project) ətrafında müzakirələr aparacaq.

Qeyd edək ki, sözügedən layihənin icrası üçün AİB Azərbaycana 160 mln. ABŞ dolları məbləğində kreditin ayrılmasını təsdiq edib və Azərbaycan hazırda bu vəsaitin 8 mln. dollarını (5%) istifadə edib.

Xatırladaq ki, 25 il müddətinə ayrılan bu uzunmüddətli kredit iki dövriyyəli 220 kV-luq ötürücü xəttin və bu xətt üzərində olan yarımstansiyaların qurulmasına sərf olunacaq. Nəticədə, «Azərenerji» ASC tərəfindən 60 ildən artıq istismar olunan mövcud iki xətt yenisi ilə əvəz ediləcək. İnfrastrukturun müasirləşdirilməsi Bakı yaxınlığındakı sənaye mərkəzi və ətraf ərazilərə elektrik enerjisinin ötürülməsində müşahidə olunan itkiləri azaltmağa və enerji təchizatının dayanıqlığına imkan verəcək. Ümumilikdə, layihənin həyata keçirilməsi ölkənin elektrik enerjisi idxalına tələbatını azaldacaq, su elektrik resurslarını optimallaşdırmağa kömək edəcək və elektrik enerjisi istehsalında qənaət edilmiş təbii qaz və mazutu ixrac etməklə ölkəyə əlavə gəlir gətirəcək. Bu kredit ölkə hökumətinin enerji təhlükəsizliyini təmin etmək, enerji sektorunun inkişaf etdirilməsi və təkmilləşdirməsi üçün prioritet proqramların reallaşmasına dəstək verəcək və özəl sektora investisiyaları cəlb etməyə kömək edəcək.

Qeyd edək ki, layihənin ümumi dəyəri 240 mln. dollar məbləğində qiymətləndirilir. Bunun 160 mln. dollarını AİB, 80 mln. dollarını isə «Azərenerji» ASC ayırır.