Maliyyə

Ana səhifə

Maliyyə

Azərbaycan Maliyyə Nazirliyində ilin yekunlarına dair kollegiya iclası keçirilib

15 fevral 2010 13:57 (UTC +04:00)

Bakı. Nicat Mustafayev – APA-Economics. Azərbaycan Maliyyə Nazirliyində 2009-cu büdcə ilinin yekunlarına həsr olunmuş geniş tərkibdə kollegiya iclası keçirilib.

Nazirlikdən «APA-Economics»ə verilən məlumata görə, kollegiya iclasında çıxış edən ölkənin maliyyə naziri Samir Şərifov qeyd edib ki, 2009-cu il əlverişsiz xarici mühit faktorlarına baxmayaraq həyata keçirilən iqtisadi siyasət tədbirləri hesabına Azərbaycan böhranın mənfi fəsadlarını uğurla dəf etməyə nail olub: «Ötən il qlobal böhranın mənfi fəsadları ölkə iqtisadiyyatına sirayət etsə də, onun gündəlik həyatında praktiki olaraq hiss olunmayıb. Bütün sosial proqramlar və tədbirlər fasiləsiz icra olunub, qarşıya qoyulmuş vəzifələr öz həllini tapmış, böhran ilinə baxmayaraq yüksək iqtisadi artıma nail olunub».

Nazir həmçinin qeyd edib ki, 2009-cu ildə sosialyönümlü tədbirlərin və xərclərin icrasına üstünlük verilib, müvafiq dövlət proqramlarının maliyyələşdirilməsi tam təmin edilib. Bu məqsədlər üçün dövlət büdcəsinin cari xərclərindən 2,763 mlrd. manat vəsait sərf edilib ki, bu da 2008-ci illə müqayisədə 450 mln. manat və ya 19,5% çoxdur.

S.Şərifovun onu da bildirib ki, 2010-cu ildə qarşıda duran mühüm vəzifələrindən biri «Büdcə sistemi haqqında» Qanununa müvafiq olaraq Azərbaycanın 2011-ci il dövlət büdcəsinin və icmal büdcənin layihəsi və sonrakı üç il üçün icmal büdcənin göstəricilərinin vaxtında və keyfiyyətlə hazırlanması işlərinin təşkilidir. Bununla bağlı qanunvericiliyə uyğun olaraq bir sıra normativ aktlar qəbul edilib və işlər həyata keçirilməkdədir.

Kollegiyada 2011-ci il üzrə dövlət büdcəsi layihəsinin və sonrakı üç il üçün icmal büdcənin göstəricilərinin hazırlanması ilə bağlı qanunvericilik və normativ hüquqi aktlardan irəli gələn vəzifələrin icrasının normal həyata keçirilməsini, layihələrinin tərtibi zamanı ölkənin iqtisadi və sosial inkişaf konsepsiyası və proqnoz göstəricilərinin əsas götürülməsini, potensial vergi ödəyiciləri, hər bir gəlir növü üzrə real bazanın müəyyən edilməsini, büdcədən maliyyələşən ayrı-ayrı təşkilatların strukturunun təkmilləşdirilməsi ilə bağlı məqsədyönlü və səmərəli işin qurulmasının vacibliyini vurğuladı. Bununla yanaşı, rayon, şəhər maliyyə orqanlarına xərclərin strukturunun, normativ-hüquqi aktların, digər təyinatlı zəruri xərclərin strukturunun və onların icra mexanizminin təkmilləşdirilməsinə dair təkliflərin hazırlanması və digər zəruri məsələlərlə bağlı tapşırıqlar verilib.

Müzakirələr zamanı çıxış edənlər hesabat ilində qarşıya qoyulan vəzifələrin ümumən icra edildiyini, yerli gəlirlər üzrə proqnozun icrasında yaranmış gərginliklə bağlı gəlir və xərclər arasında tarazlığın təmin edilməsi üçün dövlət büdcəsinin mərkəzləşdirilmiş xərclərdən rayon və şəhərlərə nəzərdə tutulan vəsaitin (dotasiyanın) artırılması istiqamətində hökumətin dəstəyini, dövlət büdcəsinin əsaslı vəsait qoyuluşu xərclərindən, dövlət büdcəsinin Ehtiyat Fondundan və Prezidentinin Ehtiyat Fondundan ayrılmış vəsaitlər hesabına rayon və şəhərlərdə ekologiya və əhalinin su təminatının yaxşılaşdırılmasını, qəza vəziyyətində olan məktəb binalarının, tibb, mədəniyyət və idman müəssisələrinin tikintisi, yenidən qurulması və onların maddi-texniki təminatının gücləndirilməsini, regionlarda abadlıq işlərinin genişləndirilməsini, büdcə xərclərinin icra mexanizminin təkmilləşdirilməsi və şəffaflığın artırılmasını, vəsaitlərin avtomatik uçotunun qurulmasını, onların daha da səmərəli istifadə edilməsini və nəzarətin gücləndirilməsini, xəzinədarlığın idarə edilməsində müasir informasiya sisteminin yaradılmasını və proqram təminatının təkmilləşdirilməsini, dövlət büdcəsindən açılan vəsaitlərin təyinatı üzrə və vaxtında çatdırılmasında operativliyin təmin edilməsi və lüzumsuz xərclərin aradan qaldırılması məqsədilə xəzinələrarası köçürmə sərəncamlarının elektron emalına başlanılmasını qeyd etdilər.

Çıxışlarda həmçinin, rayon, şəhər maliyyə orqanları tərəfindən dövlət büdcəsinin yerli gəlir və xərclərinin tərtibi və icrası prosesində, kargüzarlıq işlərinin, xəzinə əməliyyatlarının aparılmasında, maliyyə orqanlarının fəaliyyəti ilə bağlı hesabat və məlumatların vaxtında və keyfiyyətlə tərtib və təqdim edilməsində bir sıra nöqsanlara yol verildiyi qeyd edilib. Rayon, şəhər maliyyə orqanlarının rəhbərlərinə işlərində dönüş yaradılması üçün müvafiq tapşırıqlar verilib.

Kollegiya iclasının yekununda müzakirə edilən məsələyə dair müvafiq qərar qəbul edilb.