Maliyyə

Ana səhifə

Maliyyə

«SilkWay Bank» son bir ildə aktivlərini 52% artırıb

13 may 2010 07:16 (UTC +04:00)

Bakı. Elnur Hüseynquluyev – APA-Economics. Azərbaycanın «SilkWay Bank» ASC-nin aktivlərinin həcmi 2010-cu ilin aprel ayının 1-nə 46,179 mln. manat təşkil edib ki, bu da ötən ilin aprelin 1-nə olan göstəricidən 52% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 17,2% genişlənərək 8,292 mln. manat, o cümlədən əhalinin əmanətləri 63,3% azalaraq 245 min manat olub. Bankın kredit portfeli 2 dəfə artaraq 30,680 mln. manat, o cümlədən istehlak kreditlərinin həcmi 47,5% artaraq 3,671 mln. manat təşkil edib.

Eyni zamanda, bankın məcmu kapitalı 13,7% artaraq 23,167 mln. manat, o cümlədən nizamnamə kapitalı sabit qalaraq 20 mln. manat olub.

Qeyd edək ki, ötən bir il ərzində bankın gəlirləri 70% artaraq 2,025 mln. manata, xərcləri isə 47,6% artaraq 1,504 mln. manata çatıb. Nəticədə, bankın mənfəəti 3 dəfə artaraq 521 min manat təşkil edib.

Bu müddət ərzində bankın müştərilərinin sayı 3,2 dəfə artaraq 5 128-ə, o cümlədən fiziki şəxslərin sayı 4 dəfə artaraq 4 721-ə, hüquqi şəxslərin sayı isə 1,5% artaraq 407-yə çatıb.

Hesabat dövründə bankın işçilərinin sayı 58,2% artaraq 106 nəfər, orta aylıq əmək haqqı isə 11,3% artaraq 944 manat təşkil edib.

Xatırladaq ki, «SilkWay Bank» ASC 1993-cü ildə «Azal Bank» kimi yaradılıb. Sonradan bankın səhmdarları sırasına daxil olan «Azərbaycan Hava Yolları» QSC və onun tərkibində olan strukturlar öz payını «SilkWay Holding»ə satıb. Hazırda bankın səhmdarları rolunda «SilkWay Holding» (83,66%) və bir neçə fiziki şəxs çıxış edir. Bankın respublika üzrə 9 filialı fəaliyyət göstərir.