Maliyyə

Ana səhifə

Maliyyə

Azərbaycan bank sektorunda kredit və depozitlər üzrə faiz fərqi azalır

13 may 2010 12:00 (UTC +04:00)

Bakı. Vahab Rzayev – APA-Economics. Azərbaycanda manat maliyyə aktivləri və passivləri üzrə nominal faiz dərəcələri 2010-cu ilin ilk rübündə azalma meylinə malik olub. «APA-Economics»in xəbər verdiyi kimi, bu barədə Azərbaycan Mərkəzi Bankı (AMB) tərəfindən hazırlanmış yeni «Pul siyasəti icmalı»nda deyilir.

Bunun səbəbi kimi İcmalda göstərilir ki, iqtisadiyyatda faiz dərəcələrinin dinamikasına Mərkəzi Bank tərəfindən yumşaq pul siyasətinin davam etdirilməsi, habelə pul təklifinin bərpası təsir göstərib. Nəticədə, milli valyuta ilə kreditlər üzrə orta faiz dərəcələri rüb ərzində 1,9 faiz bəndi azalıb və aprelin 1-nə illik 13,99% təşkil edib. Hüquqi şəxslərə manatla verilən kreditlər üzrə orta faiz dərəcələri 2,5 faiz bəndi azalaraq 11,60%, fiziki şəxslər üzrə isə 0,61 faiz bəndi azalaraq 19,93% təşkil edib. Qeyd edək ki, xarici valyutada verilmiş kreditlər üzrə orta faiz dərəcələri rüb ərzində 1,79 faiz bəndi azalaraq 15,40%-ə bərabər olub.

Mərkəzi Bankın hesablamalarına görə, manatla kreditlər ilə depozitlər arasındakı fərq azalma trendinə malikdir. Belə ki, bu göstərici ilin əvvəlindəki 4,2%-dən aprelin 1-nə 2,6%-ə, xarici valyutada kreditlərlə depozitlər arasındakı fərq isə 6,5%-dən 4,3%-ə düşüb.

Qeyd edək ki, kredit və depozitlər üzrə faiz dərəcələrinin fərqi bank sistemində spekulyativ amillərin qiymətləndirilməsi üçün əsas göstəricilərdən biridir. Bu fərqin azalması banklar tərəfindən əsaslandırılmamış və faiz xərcləri üzrə ölçülməmiş gəlirin qazanmaq meylinin azaldığını göstərir.