Maliyyə

Ana səhifə

Maliyyə

«Korporativ və büdcə sektorunda hesabatlılıq Layihəsi» çərçivəsində keçirilən tenderin qalibi 6 məsləhətçi şirkət arasından seçiləcək

15 may 2010 10:12 (UTC +04:00)

Bakı. Nicat Mustafayev – APA-Economics. Azərbaycanda «Korporativ və büdcə sektorunda hesabatlılıq Layihəsi» (CAP/SAP) çərçivəsində keçirilən tenderdə seçki 6 məsləhətçi şirkət arasında aparılacaq.

Azərbaycan Maliyyə Nazirliyindən «APA-Economics»ə verilən məlumata görə, layihə çərçivəsində keçirilən tenderdə ümumiyyətlə 17 məsləhətçi şirkət iştirak etmək marağını bildirib və müvafiq qaydada qeydiyyatdan keçib. Tender Komissiyası tərəfindən müraciətlər «Dünya Bankı Borcalanları tərəfindən məsləhətçilərin seçimi və işə qəbul edilməsi qaydaları»nın tələblərinə uyğun olaraq təhlil edilib və 6 məsləhətçi şirkət qısa siyahıya daxil edilib. Bu şirkətlər Azərbaycan, Türkiyə, Niderland, Kanada, Böyük Britaniyada fəaliyyət göstərir.

Qeyd edək ki, layihənin məqsədi ən qabaqcıl beynəlxalq təcrübəyə uyğun olaraq ictimai əhəmiyyətli qurumların maliyyə hesabatlarının beynəlxalq standartlara, digər mühasibat uçotu subyektlərinin isə milli mühasibat uçotu standartlarına keçidinə yardım göstərilməsindən, mühasibat uçotu sahəsində müasir standartlara cavab verən təlim və təhsil sisteminin yaradılmasından ibarətdir.

Layihə üç komponentdən (korporativ sektorun maliyyə hesabatlarının tətbiqindən, büdcə sektorunun maliyyə hesabatlarının tətbiqi və mühasibat uçotu, audit və maliyyə idarəetməsi potensialının gücləndirilməsi) ibarətdir.

Layihənin dəyəri 24 mln. ABŞ dolları təşkil edir. Bunun 8 mln. dollarını Azərbaycan hökuməti, 11 mln. dollarını IBRD (ilk 10 il güzəştli şərtlərlə, illik 0,75% dərəcəsi ilə 35 il müddətinə kredit), 3 mln. dollarını Yaponiya hökuməti (birgə maliyyələşdirmə qrantı üzrə) və 2 mln. dollarını İsveçrənin İqtisadi Məsələlər üzrə Dövlət Katibliyi (SECO, qrant üzrə) ayıracaqları nəzərdə tutulub.