Maliyyə

Ana səhifə

Maliyyə

Azərbaycanda RSI indeksi yenidən azalıb

20 may 2010 06:30 (UTC +04:00)

Bakı. Vahab Rzayev – APA-Economics. Azərbaycanda pərakəndə satış indeksi (Retail Sales Index – RSI) 2010-cu ilin aprel ayı üzrə 88,1% təşkil edib. «APA-Economics»in Dövlət Statistika Komitəsinin məlumatları əsasında apardığı hesablamalara görə, bu indeks mart ayında 115%-ə bərabər olub.

RSI indeksi ay ərzində satılmış malların (iaşə müəssisələri daxil olmaqla) ümumi dəyərinin əvvəlki ayın eyni həcminə nisbəti kimi hesablanır. Belə ki, cari ilin aprel ayında ümumi pərakəndə dövriyyəsi 986,6 mln. manat, martda 1 120,5 mln. manat, fevralda 975,2 mln. manat, yanvarda isə 1 016,4 mln. manat təşkil edib. Qeyd edək ki, RSI indeksi fevral ayında 96%, yanvarda isə 75,9% olub.

Beləliklə, indeksin yanvar ayında kəskin azalmasından sonra fevral-mart aylarında həmin göstəricinin tədricən artımı, apreldə isə kəskin azalması müşahidə olunub. Bu da əhali tərəfindən aparılan alışın həcminin azalmasını əks etdirir.

Hətta ötən ayın yekunlarına görə, indeks 100%-dən aşağı səviyyəyə qayıdıb ki, bu da mart ayında son aylarda ilk dəfə olaraq indeksin 100%-i üstələməsindən sonra baş verib. Qeyd edək ki, RSI indikatorunun 100%-dən artıq olması hesabat ayı ərzində əhali tərəfindən alınan malların həcmi və ya dəyərinin əvvəlki ayla müqayisədə artmasını göstərir ki, bu da istehlak bazarında canlanmanın əsas göstəricilərindən biridir. Müvafiq olaraq, indeksin 100%-dən aşağı olması istehlak bazarında səngimənin göstəricisidir. Müəyyən dərəcədə bu nəticə 8 Mart və Novruz bayramları ilə əlaqədar pərakəndə dövriyyəsinin fevral ilə müqayisədə artması ilə bağlı olub. Apreldə isə pərakəndə dövriyyəsi yenidən fevralın səviyyəsinədək enib.