Maliyyə

Ana səhifə

Maliyyə

Bakıda «Azərbaycanda ixracın inkişaf istiqamətləri» mövzusunda tədbir keçirilib

20 may 2010 11:16 (UTC +04:00)

Bakı. Rəşad Süleymanov – APA-Economics. Bu gün Bakıda İqtisadi İnkişaf Nazirliyinin təşkilatçılığı ilə «Azərbaycanda ixracın inkişaf istiqamətləri» mövzusunda tədbir keçirilib.

«APA-Economics»in məlumatına görə, tədbirdə çıxış edən İqtisadi İnkişaf Nazirliyi Aparatının rəhbəri Samir Vəliyev bildirib ki, dövlət başçısının «Azərbaycan Respublikasında idxal-ixrac əməliyyatlarının tənzimlənməsi qaydalarının təkmilləşdirilməsi sahəsində əlavə tədbirlər haqqında» mayın 14-də imzaladığı fərman bu sahədə xüsusi əhəmiyyətə malikdir: «Fərmanla edilmiş əlavə və dəyişikliklərin əsas məqsədi idxal-ixrac prosedurlarının günün tələblərinə uyğunlaşdırılması və sadələşdirilməsi, sahibkarlığa dövlət dəstəyinin gücləndirilməsi, regionların ixracın diversifikasiyası, qeyri-neft məhsullarının istehsalının və ixracının daha da artırılmasını əks etdirir».

S.Vəliyev qeyd edib ki, son 5 ildə ölkədə yoxsulluğun səviyyəsi 3 dəfə azalıb, ötən il dünya bazarlarında neftin qiymətinin aşağı düşməsinə baxmayaraq, ölkədə iqtisadi inkişaf gedib. Cari ilin birinci rübündə isə ümumi daxili məhsul istehsalı 5,4%, o cümlədən qeyri-neft sektorunda 4,3% artıb. Həmçinin, qeyri-neft ixracının ötən ilin müvafiq dövrü ilə müqayisədə 2,3 dəfə artdığını deyən S.Vəliyev son fərmanın idxal-ixrac əməliyyatlarının genişləndirilməsində xüsusi əhəmiyyətini qeyd edib.

İqtisadi İnkişaf Nazirliyi sahibkarlığın inkişafı siyasəti şöbəsinin müdir müavini Hüseyn Paşayev sözügedən fərman barədə tədbir iştirakçılarına məlumat verib. H.Paşayev bildirib ki, idxal-ixrac əməliyyatlarının tənzimlənməsi ilə bağlı qaydalara edilmiş əlavə və dəyişikliklərə əsasən, idxal-ixrac əməliyyatları zamanı tələb olunan sənədlərin sayı və prosedurlar azaldılıb, ixrac prosesində hesablaşmalar sadələşdirilib və ixracatçılar üçün daha əlverişli şərait yaradılıb.