Maliyyə

Ana səhifə

Maliyyə

«AccessBank» QSC 5 brilliantlı «Şəffaflıq» reytinqi ilə mükafatlandırılıb

24 may 2010 13:41 (UTC +04:00)

Bakı. Elnur Hüseynquluyev – APA-Economics. Mikromaliyyə sahəsində aparıcı məlumat xidmətləri təchizatçısı olan «Microfinance Information Exchange» (MIX) şirkəti «AccessBank» QSC-ni beş brilliantla ölçülən ən yüksək «Şəffaflıq» reytinqi ilə mükafatlandırıb.

Bankın baş ofisindən «APA-Economics»ə verilən məlumata görə, MIX bütün dünya üzrə mikromaliyyə institutları haqqında məlumat toplayır və onları yaydıqları məlumatın həcminə görə qiymətləndirir. MIX hər bir mikromaliyyə institutunun fəaliyyətinin şəffaflıq səviyyəsini müəyyən etmək üçün «brilliant» sistemini tətbiq edir. Brilliantların sayı nə qədər çox olarsa, şəffaflıq səviyyəsi də bir o qədər yüksəkdir.

«AccessBank»ın İdarə Heyətinin sədri Endrü Pospielovskinin sözlərinə görə, bank öz fəaliyyətində daim şəffaflıq prinsipinə sadiq qalır: «MIX-in 5 brilliant şəffaflıq reytinqi bunun bariz nümunəsidir».

Xatırladaq ki, «AccessBank» QSC 2002-ci ilin oktyabr ayında Azərbaycan Mikromaliyyələşdirmə Bankı kimi fəaliyyətə başlayıb və 2008-ci ilin sentyabr ayında brendini dəyişib. Bankın təsisçiləri rolunda Avropa Yenidənqurma və İnkişaf Bankı (20%), Beynəlxalq Maliyyə Korporasiyası (20%), Qara Dəniz Ticarət və İnkişaf Bankı (20%), Almaniyanın KfW Bankı (20%), «AccessHolding» (16,53%) və «LFS Financial Systems GmbH.» şirkəti (3,47%) çıxış edir. Bankın ölkə üzrə 23 filialı, 23 bankomatı və 48 POS-terminalı fəaliyyət göstərir.