Maliyyə

Ana səhifə

Maliyyə

«Bank Respublika» bu il kredit portfelini 20% artıracaq

02 iyun 2010 10:20 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Respublika» ASC-nin kredit portfelində 2010-cu il ərzində 15-20% artım proqnozlaşdırılır. Bunu «APA-Economics»ə açıqlamasında bankın İdarə Heyətinin üzvü Aqşin Əmirov bildirib.

A.Əmirovun sözlərinə görə, 2009-cu il ərzində bankın kredit portfelində azalma olub ki, bu da bank tərəfindən planlı şəkildə həyata keçirilib: «Hazırda isə bank kreditləşməsi nisbətən sürətlənib və bu il ərzində artım gözlənilir. Lakin bu artım 15-20%-dən yuxarı olmayacaq, portfelin ilin sonuna təxminən 200 mln. manata çatdırılması planlaşdırılır».

A.Əmirov bankın kredit portfelində sürətli artımın olmamasını dünya maliyyə böhranın təsirləri ilə izah edib: «Dünya maliyyə böhranın təsirləri hələ bitməyib, ona görə də kredit portfelinin artımını sürətləndirməyə ehtiyac yoxdur. Biz bu situasiyanı izləyirik».

A.Əmirov daha sonra bankın fiziki şəxslər üzrə əmanətlərin faiz dərəcələrini qarşıdan gələn dövr ərzində illik 8% dərəcəsinədək azaldılacağını qeyd edib: «Bankda yaranmış izafi likvidliklə bağlı bu ilin mart ayında depozitlər üzrə faiz dərəcəsində azalma olub. Lakin biz düşünmürük ki, fiziki şəxslər üzrə əmanətlərin faiz dərəcəsi azaldıqda əmanətçilərin sayı kəskin azalacaq. Tendensiya göstərir ki, əmanətçilərin sayı artmaqda davam edir».

Qeyd edək ki, cari ilin aprel ayının 1-nə bankın aktivlərinin həcmi 334,484 mln. manat, depozit portfeli 153,807 mln. manat, kredit portfeli 177,032 mln. manat, məcmu kapitalı 56,049 mln. manat, o cümlədən nizamnamə kapitalı 30,578 mln. manat təşkil edib.

Xatırladaq ki, «Bank Respublika» ASC 1992-ci ildən fəaliyyət göstərir. Bankın səhmdarları sırasında səhmdar kapitalında «25%+1 səhm» paketinə sahib olan Almaniyanın iki iri maliyyə təşkilatı – «DEG İnvestisiya Şirkəti» və «Sparkassen International Development Trust» təmsil olunur. Hazırda bankın ölkə üzrə 28 filialı, 44 bankomatı və 254 POS-terminalı mövcuddur.