Maliyyə

Ana səhifə

Maliyyə

Türkiyə və Azərbaycan hökumətləri Yüksək Səviyyəli Strateji Şura yaratmaq niyyətindədir

29 iyul 2010 15:18 (UTC +04:00)

«APA-Economics»in məlumatına görə, bunu Azərbaycana səfərinin yekunlarına dair keçirdiyi mətbuat konfransında Türkiyənin xarici ticarət məsələləri üzrə dövlət naziri Zəfər Çağlayan bildirib.

Azərbaycana səfəri çərçivəsində prezident İlham Əliyev, baş nazir Artur Rasizadə və bir sıra hökumət strukturlarının rəhbərləri ilə görüşlər keçirdiyini deyən nazir danışıqlarda Azərbaycan və Türkiyə arasında bir sıra vacib məsələlərin, o cümlədən iqtisadi əlaqələrin genişləndirilməsi imkanlarının müzakirə olunduğunu qeyd edib.

«Səfər çərçivəsində mən iqtisadi inkişaf, maliyyə, nəqliyyat nazirləri, baş nazirin müavini, həmçinin Dövlət Gömrük Komitəsinin sədri ilə görüşdüm. Görüşdə bir sıra önəmli məsələlər müzakirə olunub və bəzi məsələlərlə bağlı razılıq əldə edilib», - deyə Z.Çağlayan vurğulayıb.

Nazir bildirib ki, o, Azərbaycana 80-dən artıq şirkət, 10-a yaxın təşkilatdan, həmçinin müxtəlif media qurumlarının əməkdaşlarından, ümumilikdə 130 nəfərlik heyətlə gəlib. Bu gün keçirilən Azərbaycan-Türkiyə biznes-forumuna Azərbaycan tərəfdən 150-yə yaxın iş adamı qatılıb. Tədbir çərçivəsində 500-dən artıq ikitərəfli işgüzar görüşlər keçirilib, 10 şirkət arasında ümumi dəyəri 10 mln. ABŞ dolları təşkil edən anlaşma əldə edilib.

Z.Çağlayan ölkəsinin Azərbaycanın iqtisadi cəhətdən güclənməsinə daim dəstək verdiyini də xatırladıb. «Dağlıq Qarabağla məsələsinə Türkiyə və Azərbaycan vətəndaşlarının baxışları arasında heç bir fərq yoxdur», - deyən nazir Dağlıq Qarabağ münaqişəsinin həlli ilə bağlı Türkiyənin mövqeyini bir daha təkrarlayıb.

Z.Çağlayan ölkəsinin Naxçıvan Muxtar Respublikası ilə əlaqələri genişləndirməyə də maraqlı olduğunu qeyd edib. Onun sözlərinə görə, hazırda Naxçıvana həftədə 3 dəfə uçuşlar həyata keçirən «Türk Hava Yolları» şirkətinin reyslərin sayını 4-ə çatdırması gözlənilir.

«Ölkələr arasında bu gün ticarət dövriyyəsi 2,2 mlrd. dollardır. Özlüyündə bu rəqəm yaxşıdır. Amma imkanlarımız, potensialımız önündə, yetərli deyil», - deyə dövlət naziri əlavə edib.

Z.Çağlayan «Türkiyə İş Bankası»nın Azərbaycanda nümayəndəlik açmaq istədiyini, bu məqsədlə Azərbaycan Mərkəzi Bankına müraciət etdiyini, həmçinin Türkiyə şirkətlərinin Azərbaycanla turizm, o cümlədən qış turizminin inkişaf etdirilməsinə dair layihələrdə iştirak edə biləcəyini vurğulayıb.

Türkiyəli nazir əlavə edib ki, Bakıda keçirdiyi görüşlərdə hökumətlər arasında Yüksək Səviyyəli Strateji Şuranın yaradılması istiqamətində müzakirələr də aparıb. Azərbaycan tərəfi ilə görüşlərin nəticəsi olaraq, şirkətlər arasındakı mübahisələrin araşdırılması üçün bir vaxtlar hökumətlərin müvafiq strukturlarının nümayəndələrinin təmsil olunduğu komitənin fəaliyyətinin bərpa edilməsi barədə razılıq əldə olunub.