Maliyyə

Ana səhifə

Maliyyə

Azərbaycan və Dünya Bankı arasında 242 mln. dollarlıq kredit sazişi imzalanıb

11 avqust 2010 11:28 (UTC +04:00)

«APA-Economics»in məlumatına görə, sazişi Azərbaycan hökuməti tərəfdən nəqliyyat naziri Ziya Məmmədov, Dünya Bankı adından isə bankın Azərbaycan üzrə ölkə meneceri Cozef Ouen imzalayıb.

Saziş özündə 70 mln. ABŞ dolları ekvivalentində Beynəlxalq İnkişaf Assosiasiyası (IDA – Dünya Bankı Qrupunun üzvü) və 171,6 mln. ABŞ dolları məbləğində Beynəlxalq Yenidənqurma və İnkişaf Bankı (IBRD - Dünya Bankı Qrupunun üzvü) kreditini əhatə edir.

İmzalanma mərasimində qeyd olunub ki, layihə Bakı-Şamaxı avtomobil yolunun iki zolaqdan dörd zolağa genişləndirilməsi yolu ilə təhlükəsizliyin və səmərəliliyin artırılmasını nəzərdə tutur.

«Avropa ilə Asiyanın, şimal ilə cənubun kəsişməsində yerləşən Azərbaycan regionda malların və enerjinin hərəkətində tranzit mərkəzi kimi çıxış etmək üçün unikal imkana malikdir», - deyə C.Ouen vurğulayıb.

Bu layihə ilə Dünya Bankının Azərbaycanın yol sektoruna yardımının üçüncü mərhələsinə start verdiyini deyən bank rəsmisi qeyd edib ki, layihədə iki yanaşmadan istifadə olunacaq. Birincisi, Azərbaycanın magistral yol şəbəkəsi və tranzit dəhlizlərinə, ikincisi isə regional inkişaf strategiyası çərçivəsində yerli yollarla fokuslaşacaq.

Üçüncü Magistral Yol Layihəsi 3 komponentdən ibarətdir. Birinci komponent yolların təkmilləşdirilməsidir. Bu çərçivədə Bakı-Şamaxı yolunun 100 km-lik hissəsinin 4 zolağadək genişləndirilməsi və əlaqəli yol təhlükəsizliyi tədbirləri nəzərdə tutulur. İkinci institusional inkişaf komponentidir. Bura magistral yol şəbəkəsinin idarə edilməsi və maliyyələşdirilməsi üçün müasir üsulları müəyyənləşdirmək məqsədi ilə araşdırmaların aparılması, yol qurumunun yolların istismarı və idarə edilməsi sahəsində institusional inkişafı daxildir. Sonuncu isə layihənin idarə edilməsi komponentidir və bu çərçivədə layihə icra qrupunu dəstəkləmək üçün məsləhət xidmətləri, avadanlıq və texniki yardım maliyyələşdiriləcək.

Qeyd edək ki, Azərbaycan Dünya Bankına 1992-ci ildə qoşulub. İndiyədək Dünya Bankı Azərbaycan üçün ümumi məbləği 2,237 mlrd. ABŞ dolları təşkil edən 42 layihəni təsdiq edib.