Maliyyə

Ana səhifə

Maliyyə

Azərbaycan Mərkəzi Bankı I yarımillikdə 600 mln. dollarlıq valyuta sterilizasiyası həyata keçirib

12 avqust 2010 13:00 (UTC +04:00)

«APA-Economics»in məlumatına görə, bu barədə Mərkəzi Bankın I yarımillik üzrə hazırladığı «Pul siyasəti İcmal»ında deyilir.

İcmala əsasən, ötən ilin I yarısında Mərkəzi Bank satışyönlü müdaxilələr həyata keçirdiyi halda, cari ilin I yarısında 598,5 mln. ABŞ dolları həcmində valyuta sterilizasiyası həyata keçirib. Ötən ilin müvafiq dövrü ilə müqayisədə valyuta bazarında xarici valyutaya tələbatın azalması banklar tərəfindən ölkəyə gətirilən nağd xarici valyutanın və əhaliyə satılan nağd valyutanın həcmindən də görünür. Belə ki, dövr ərzində banklar tərəfindən ölkəyə xalis gətirilən nağd xarici valyutanın və xalis nağd mübadilə əməliyyatlarının həcmi 2009-cu ilin I yarısına nisbətən müvafiq olaraq 18% və 21,3% az olub.

Qeyd edək ki, 2010-cu ilin yanvar-iyun aylarında manatın dollara qarşı məzənnəsi cəmi 0,04% ucuzlaşıb. Yarım il ərzində manatın məzənnəsinin sabitliyi ölkədə inflyasiyanın, xarici borc yükünün, dollarlaşmanın artmamasına və bütövlükdə əhalinin sosial vəziyyətinin yaxşılaşmasının dəstəklənməsinə əlverişli şərait yaradıb.

Mərkəzi Bankın hesablamalarına görə, yarım ildə manatın nominal məzənnəsi ticarət partnyoru olan bəzi ölkələrin valyutalarına qarşı dəyərdən düşdüyü halda, digər ölkələrin valyutalarına qarşı möhkəmlənib. Manatın nominal ikitərəfli məzənnəsinin dinamikası real ikitərəfli məzənnələrin də dəyişməsinə təsir göstərib. Yanvar-iyun aylarında manat bəzi ölkələrin (Ukrayna, Qazaxıstan) valyutalarına qarşı həm nominal, həm də real olaraq ucuzlaşıb. Hesabat dövründə qeyri-neft sektoru üzrə nominal effektiv məzənnə (ümumi ticarət dövriyyəsi üzrə) 5,9% bahalaşıb ki, bu da inflyasiyaya azaldıcı təsir göstərib.

Partnyor ölkələrdəki inflyasiyanın Azərbaycandakı inflyasiyanı üstələməsi manatın real effektiv məzənnəsinə 0,8 faiz bəndi azaldıcı təsir göstərib. Real effektiv məzənnə qeyri-neft sektoru üzrə dövr ərzində 5% bahalaşıb. Ötən ilin müvafiq dövrü ilə müqayisədə nominal effektiv məzənnə və real effektiv məzənnə müvafiq olaraq 3,8% və 4,9% bahalaşıb.