Maliyyə

Ana səhifə

Maliyyə

Azərbaycan Mərkəzi Bankının likvidlik əməliyyatları üzrə müsbət saldo artıb

12 avqust 2010 14:13 (UTC +04:00)

Bakı. Vahab Rzayev – APA-Economics. Azərbaycan Mərkəzi Bankı (AMB) pul siyasəti qarşısında qoyulan məqsədlərə nail olmaq üçün 2010-cu ilin I yarısında faiz dəhlizinin parametrlərini dəyişdirməyib, uçot dərəcəsini 2%, dəhlizin aşağı həddini 1%, yuxarı həddini isə 7% səviyyəsində saxlayıb. «APA-Economics»in məlumatına görə, bu barədə Mərkəzi Bankın 2010-cu ilin yanvar-iyun ayları üzrə hazırladığı «Pul siyasəti İcmal»ında deyilir. Həmçinin, hesabat dövrü ərzində məcburi ehtiyat normaları da dəyişdirilməyərək 0,5% səviyyəsində qalıb.

Məcburi ehtiyat normalarının ortalama müddəti dövr ərzində həm manat, həm də xarici valyutada depozitlər üzrə 1 ay olub.

Cari ilin 6 ayı ərzində AMB tərəfindən likvidliyin tənzimlənməsi üzrə aparılmış əməliyyatları üzrə saldo ilin əvvəlindəki 1 454 mln. manatdan iyunun sonuna 1 574,8 mln. manatadək artıb. Qeyd edək ki, likvidliyin verilməsi alətləri üzrə əməliyyatların həcmi likvidliyin cəlb edilməsi alətləri üzrə əməliyyatların həcmini təxminən 34 dəfə üstələyir ki, bu da likvidliyin tənzimlənməsi siyasətində likvidlik verilməsinin prioritetliyini sübut edir.

Qeyd edək ki, likvidliyin verilməsi alətləri sırasında ilk növbədə AMB tərəfindən banklara verilən kreditlər, likvidliyin cəlb edilməsi alətləri sırasında isə notlar, repo əməliyyatları, milli və xarici valyutada məcburi ehtiyat normaları üstünlük təşkil edir.