Maliyyə

Ana səhifə

Maliyyə

İstanbul Maliyyə Sammitində bir sıra beynəlxalq təşkilatların başçıları iştirak edəcək

16 avqust 2010 14:31 (UTC +04:00)

IFS əlaqə ofisinin İcra Komitəsinin baş katibi Bəstə Polatlının «APA-Economics»ə verdiyi məlumata görə, sammit Şimali Amerika, Avropa, Şərqi Asiya, körfəz ölkələrində fəaliyyət göstərən tanınmış maliyyə təşkilatlarının rəhbərlərini bir araya gətirəcək.

«PGlobal» və «Yedi24» Şirkətlər Qrupu tərəfindən Almaniyanın «Financial Gates GmbH.» şirkətinin iştirakı ilə təşkil edilən və hər il təşkil edilməsi planlaşdırılan İstanbul Maliyyə Zirvəsi Bahçeşehir Universitetində reallaşacaq.

Milli və beynəlxalq arenada öncül maliyyəçilərin qatılacağı «IFS-2010» sahəsində bir ilk olacaq. Sammit 9 fərqli panel iclas ilə reallaşdırılacaq. «IFS-2010» İstanbulun dünya maliyyə mərkəzinə çevrilməsi layihəsi çərçivəsində keçirilən ilk tədbirdir.

«Hədəf kütləsi olaraq təyin olunan bank rəhbərliklərinin, xüsusi sektor nümayəndələrinin, tənzimləyici qurumların, mütəxəssislərin və alimlərin bu sammitdə bir araya gəlməsi Türkiyə və İstanbul üçün bir fürsətdir. Sammit önəmli iştirakçıların təsiri ilə maliyyə böhranından sonra maliyyə sektorunun yenidən inkişaf etdirilməsinə əhəmiyyətli töhvə verəcək», - deyə B.Polatlı bildirib.

Tədbirdə həmçinin dünyanın maliyyə sektorunda vəziyyət, dünya iqtisadiyyatının gələcəyi müzakirə olunacaq. Açılışı hökumətin üst səviyyəli rəsmi şəxslərinin iştirakı ilə gerçəkləşdiriləcəyi sammitdə əsas məruzəçilər maliyyə və iqtisadiyyat sahəsində beynəlxalqsəviyyəli şəxslər olacaqlar.

Sammitdə Türkiyənin dövlət naziri və baş nazir köməkçisi Əli Babacan, millət vəkili Cuneyt Yüksəl, Türkiyə xəzinə katibi İbrahim Çanaqçı, Sərmayə Bazarı Təşkilatı (SPK) rəhbəri Vedat Akgiray, Mərkəz Bankının rəhbəri Durmuş Yılmaz, İstanbul Daşınan Qiymətlər Birjası (İMKB) başçısı Hüseyn Erkan, İstanbul Ticarət Palatasının (İTO) rəhbəri Murad Yalçıntaş, Almaniya Federal Maliyyə Nəzarəti İdarəsinin rəhbəri Yoxen Sanio (Jochen Sanio), Meksika Mərkəzi Bankının sədri Auqustin Karstens, İslam İnkişaf Bankının prezidenti Əhməd Məhəmməd Əli, Polşa Mərkəz Bankı İdarə Heyəti üzvü Zbiqnev Hockuba, «Citi Group»un baş iqtisadçısı Vilyam Buyter və digər şəxslərin iştirakı gözlənilir.

Sammitdə dünya böhranından sonra maliyyə sektorunda vəziyyətin normallaşdırılması, ticarətin maliyyələşdirilməsi və ixracat kreditlərinin sığortalanması, islam maliyyəsi, islam bankçılığı və sərmayə bazarları, enerji və yerli layihələrin maliyyələşdirilməsi, özəl sərmayələr, sərmayə bazarları və alternativ maliyyə qaynaqları və s. mövzularda panel sessiyaların keçirilməsi nəzərdə tutulur.

Qeyd edək ki, Azərbaycanın APA İnformasiya Agentliyi «IFS-2010»un rəsmi media tərəfdaşı seçilib.