Maliyyə

Ana səhifə

Maliyyə

«NBC Bank» son bir ildə depozit portfelini 76% genişləndirib

17 avqust 2010 12:10 (UTC +04:00)

Bakı. Elnur Hüseynquluyev – APA-Economics. Azərbaycanın «NBC Bank» ASC-nin aktivlərinin həcmi 2010-cu ilin iyul ayının 1-nə 46,792 mln. manat təşkil edib ki, bu da 2009-cu ilin iyulun 1-nə olan göstərici ilə müqayisədə 5% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın kredit portfeli 9% artaraq 40,024 mln. manat, o cümlədən istehlak kreditlərinin həcmi 1,6% artaraq 35,437 mln. manat olub. Bu müddət ərzində bankın depozit portfeli 76,4% genişlənərək 7,201 mln. manata, o cümlədən əhalidən cəlb edilən əmanətlərin həcmi 77,1% artaraq 6,433 mln. manata çatıb.

Həmçinin, bankın məcmu kapitalı 1,2% azalaraq 16,341 mln. manat, o cümlədən nizamnamə kapitalı 15% artaraq 15,598 mln. manat təşkil edib.

Qeyd edək ki, son bir ildə bankın ümumi gəlirləri 4,500 mln. manat olub ki, bu da ötən ilin müvafiq dövrünün göstəricisi ilə müqayisədə 4,4% azdır. Həmçinin bankın xərcləri ötən ilin iyulun 1-nə nisbətən 88% artaraq 5,352 mln. manat olub. Nəticədə, bank cari ilin yanvar-iyun aylarını 852 min manat zərərlə başa vurub. Onu da qeyd edək ki, ötən ilin birinci yarısında bankın mənfəəti 1,859 mln. manat olub.

Xatırladaq ki, ötən bir il ərzində bankın müştərilərinin sayı 19% artaraq 14 310-ya, o cümlədən fiziki şəxslərin sayı 18,8% artaraq 14,030-a, hüquqi şəxslərin sayı isə 15% artaraq 280-ə çatıb. Bu müddət ərzində işçilərin sayı 1,4% azalaraq 140 nəfər, işçilər üçün orta aylıq əmək haqqı isə 86% artaraq 608 manat təşkil edib.

Bankın cəmi aktiv plastik kartlarının sayı 1% artaraq 1 619, o cümlədən kredit kartlarının sayı 34,4% artaraq 891-ə, debet kartları isə 22,6% azalaraq 728-ə çatıb.

«NBCBank» ASC 1992-ci ilin dekabrında «Ruzi» Kommersiya Bankı adı ilə fəaliyyətə başlayıb. Cari ilin iyul ayının 1-nə bankın ölkə üzrə 7 filialı, 6 bankomatı və 44 POS-terminalı mövcuddur.