Maliyyə

Ana səhifə

Maliyyə

«Qarant Sığorta» şirkəti son bir ildə bir neçə sığorta növü üzrə yığımları kəskin artırıb

26 avqust 2010 10:42 (UTC +04:00)

Bakı. Elnur Hüseynquluyev – APA-Economics. Azərbaycanın «Qarant Sığorta» şirkətinin 2010-cu ilin yanvar-iyun aylarında «Əmlakın yanğından sığortası» növü üzrə topladığı sığorta haqlarının həcmi 783,2 min manat təşkil edib ki, bu da ötən ilin müvafiq dövrü ilə müqayisədə 26 dəfə çoxdur. Şirkətinin bu məhsul üzrə bazar payı təqribən 10%-dir. Bu barədə «APA-Economics»ə şirkətin baş ofisindən məlumat verilib.
«Qarant Sığorta»nın İdarə Heyətinin sədri Vaqif Həsənovun sözlərinə görə, qısa zaman kəsiyində əmlak sığortası satışları üzrə artıma nail olmağın əsas səbəbi müştərilərin şirkətə olan inamıdır. «Fəaliyyət göstərdiyimiz 2 ildən artıq müddət ərzində biz bazarın ən gənc oyunçusu olmaqla yanaşı ən dinamik inkişaf edən şirkətiyik. Yalnız bir məhsul üzrə satışlarımızın bir il ərzində 26 dəfə artması bunun bariz göstəricisidir. Biz bu cür artımı başqa məhsullarımız üzrə də əldə edirik», - deyə V.Həsənov bildirib.
Hesabat dövründə şirkətin «Avtomobil sığortası» üzrə yığımları 2010-cu ilin birinci yarısında 816,8 min manat təşkil edib ki, bu da 2009-cu ilin müvafiq dövrünün eyni göstəricisindən 3,25 dəfə çoxdur. Azərbaycanın avtomobil sığortası bazarının 5,2%-i «Qarant Sığorta»ya məxsusdur. Cari ilin yanvar-iyun aylarında «Avtomobil sığortası» üzrə ödənişlərin həcmi 284,64 min manat təşkil edib.
Xatırladaq ki, təsisçisi «ZQAN Holding» Şirkətlər Qrupu olan «Qarant Sığorta» şirkəti 2007-ci ilin noyabr ayından fəaliyyət göstərir. Cari ilin avqust ayının 1-nə şirkətin nizamnamə kapitalı 4 mln. manat təşkil edib. Hazırda şirkət 18 könüllü və 4 icbari sığorta növü üzrə xidmət göstərir.