Maliyyə

Ana səhifə

Maliyyə

«Parabank»ın aktivləri son bir ildə 38% artıb

30 avqust 2010 10:39 (UTC +04:00)

Bakı. Elnur Hüseynquluyev – APA-Economics. Azərbaycanın «Parabank» ASC-nin aktivlərinin həcmi 2010-cu ilin iyul ayının 1-nə 102,942 mln. manat təşkil edib ki, bu da ötən ilin iyulun 1-i ilə müqayisədə 38% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 39% genişlənərək 59,651 mln. manat, o cümlədən əhalinin əmanətləri 34% artaraq 54,431 mln. manata çatıb. Bankın kredit portfeli 43% artaraq 69,093 mln. manat, o cümlədən istehlak kreditlərinin həcmi 25% artaraq 35,828 mln. manat təşkil edib. Bu müddət ərzində bankın məcmu kapitalı 17% artaraq 13,420 mln. manat, o cümlədən nizamnamə kapitalı 15% artaraq 15,570 mln. manat olub.

Qeyd edək ki, son bir il ərzində bankın gəlirləri 45% artaraq 8,961 mln. manata, xərcləri isə 39% artaraq 8,384 mln. manata çatıb. Nəticədə, son bir ildə bankın əldə etdiyi mənfəətin həcmi 4,2 dəfə artaraq 0,577 mln. manat təşkil edib.

Bundan başqa, bu müddət ərzində bankın müştərilərinin sayı 13% artaraq 17 880, o cümlədən fiziki şəxslərin sayı 13,3% artaraq 16 138, hüquqi şəxslərin sayı isə 8% artaraq 1 742 olub. Bununla yanaşı, son bir ildə aktiv plastik kartların sayı 69% artaraq 3 909-a, o cümlədən debet kartlarının sayı 7,8 dəfə artaraq 10 042-yə, kredit kartlarının sayı 2,8 dəfə artaraq 2 867-yə çatıb.

Qeyd edək ki, bu müddət ərzində bankın işçilərinin sayı 32% artaraq 396 nəfər, orta aylıq əmək haqqı isə 1,4% artaraq 445 manat təşkil edib.

Xatırladaq ki, təsisçisi 23 fiziki şəxs olan «Parabank» ASC 1991-ci ildən fəaliyyət göstərir. Cari ilin iyul ayının 1-nə bankın ölkə üzrə 15 filialı, 17 bankomatı və 125 POS-terminalı mövcuddur.