Maliyyə

Ana səhifə

Maliyyə

Azərbaycanda hüquqi şəxslərin bank depozitləri kəskin azalıb

30 avqust 2010 11:27 (UTC +04:00)

Bakı. Vahab Rzayev – APA-Economics. Azərbaycanda fəaliyyət göstərən kommersiya banklarında yerləşdirilmiş depozitlərin ümumi həcmi 2010-cu ilin avqust ayının 1-nə 4 401,4 mln. manat təşkil edib ki, bu da 2009-cu ilin müvafiq dövrü ilə müqayisədə 11 mln. manat və ya 0,3% çoxdur. Eyni zamanda, cari ilin əvvəlindən bu göstərici 252,8 mln. manat və ya 5,4%, təkcə iyulda isə 310 mln. manat və ya 6,6% azalıb.

Azərbaycan Mərkəzi Bankından «APA-Economics»ə verilən məlumatına görə, depozitlərin tərkibində ev təsərrüfatların depozitləri (əhalinin əmanətləri) 2 716,3 mln. manata, qeyri-maliyyə təşkilatlarının depozitləri isə 1 685,1 mln. manata bərabərdir. Beləliklə, depozitlərin strukturunda fiziki şəxslərin əmanətlərinin xüsusi çəkisi 61,7%-ə bərabərdir.

Qeyd edək ki, fiziki və hüquqi şəxslərin depozitləri üzrə tendensiyalar tam fərqlidir. Belə ki, ev təsərrüfatları üzrə depozitlərin illik artım tempi 35,8% təşkil etdiyi halda, qeyri-maliyyə təşkilatlarının depozitləri il ərzində 29,5% azalıb. Təkcə iyul ayında fiziki şəxslərin əmanətləri 153,5 mln. manat və ya 6% artıb, hüquqi şəxslərin depozitləri isə 463,5 mln. manat və ya 21,6% azalıb.

Beləliklə, Azərbaycan bank sistemində mənfi tendensiyalar yaranıb ki, bu da banklar tərəfindən son aylarda ərzində yeridən siyasətin nəticəsidir. Yəni, avqustun 1-nə olan göstəricilər bank sistemində likvidliyin artmasını, eyni zamanda aktiv əməliyyatlarında enişi sübut edir. Qeyd edək ki, cari ilin iyul ayında bankların məcmu aktivləri 3%, məcmu kredit portfeli isə 2% azalıb. Bunun nəticəsi kimi hüquqi şəxslər fəaliyyətlərin maliyyələşdirilməsi üçün öz depozitlərində olan vəsaitləri xərcləməli olur. Banklar isə öz növbəsində potensial mənfəəti əldə vermiş olur ki, bu da onlar tərəfindən yeridilən ehtiyatlı siyasətin birbaşa mənfi nəticəsidir. Sözügedən göstərici və nəticələri ümumiləşdirərək demək olar ki, Azərbaycan bank sistemi iqtisadiyyatı maliyyə-kredit vəsaitləri ilə təmin etmək, iqtisadiyyatı borc vəsaitləri ilə təmin etmək və iqtisadiyyatın inkişafı üçün zəruri olan maliyyə mənbəyi olmaq funksiyaların icrasında böyük çətinliklərlə üzləşməkdədir. Həmin vəziyyət gələcək aylarda da davam edərsə və bununla tendensiya xarakteri alarsa, bank sistemində «passivlik böhranı» yaranacaq.