Maliyyə

Ana səhifə

Maliyyə

«DəmirBank»ın buraxdığı plastik kartların sayı 70 mini ötüb

03 sentyabr 2010 09:50 (UTC +04:00)

Bakı. Elnur Hüseynquluyev – APA-Economics. Azərbaycanın «DəmirBank» ASC-nin emissiya etdiyi plastik kartlarının sayı 70 mini keçib.
Bankın baş ofisindən «APA-Economics»ə verilən məlumata görə, bu münasibətlə bankın 70 000-ci kart sahibi təbrik edilib və ona fəxri hədiyyə təqdim olunub. Bu kartın sahibi bankın Əməliyyat İdarəsi filialının müştərisidir. Plastik kartın sahibinin xahişinə əsasən onun adı açıqlanmır.
Bankın İdarə Heyətinin sədr müavini Yusif Cabbarovun sözlərinə görə, bütün sahələrdə olduğu kimi plastik kart müştərilərinin də məmnunluğu çox önəmlidir. Bunu nəzərə alaraq, bank tərəfindən bir sıra kampaniyalar keçirilir, mütəmadi yeni xidmətlər tətbiq edilir və şərtlər daha da optimallaşdırılır. «Bütün bunlar müştərilərə plastik kartlar sahəsində geniş imkanlardan yararlanmağa və kartlardan daha rahat istifadəyə imkan verir. Plastik kartların inkişafı konsepsiyasına uyğun olaraq plastik kartlar üzrə xidmətlərin və xidmət keyfiyyətinin artırılması üzrə digər yeniliklər də nəzərdə tuturuq», – deyə Y.Cabbarov bildirib.
Qeyd edək ki, «DəmirBank» 2010-cu ilin mart ayından etibarən plastik kartlar üzrə «5 manata» və «Pulsuz» müddətsiz kampaniyalarını keçirir. «5 manata» kampaniyasına əsasən, müştərilər yalnız 5 manat ödəməklə «VISA Classic» və «MasterCard Standard» kartlarını əldə edə bilər. «Pulsuz» kampaniyasına əsasən müştəri plastik kartı tam pulsuz əldə edə bilər, lakin bu halda kart hesabına ilkin mədaxil edilməlidir.
Xatırladaq ki, «DəmirBank» (əvvəlki «Azərdəmiryolbank») 1989-cu ildə fəaliyyətə başlayıb. Bankın səhmdarları sırasına beynəlxalq maliyyə təşkilatları olan Avropa Yenidənqurma və İnkişaf Bankı və Hollandiya İnkişaf Maliyyə Şirkəti (FMO) daxildir.