Maliyyə

Ana səhifə

Maliyyə

Gələn ildən «Azərikimya»da bütün maliyyə-hesabat əməliyyatları SAP sisteminə keçiriləcək

03 sentyabr 2010 10:30 (UTC +04:00)

Bakı. Nicat Mustafayev – APA-Economics. İstehsalat fəaliyyətinin tənzimlənməsi, maliyyə-uçot əməliyyatlarına daha ciddi nəzarət edilməsi və müəyyən proqnozlaşdırma-planlaşdırma işlərinin mükəmməl aparılması, əməliyyatların çeviklik xüsusiyyəti baxımından olduqca mühüm olan və səmərəli nəticələr verən SAP sisteminin yaxın zamanlarda Azərbaycan Dövlət Neft Şirkətinin (ARDNŞ) «Azərikimya» İstehsalat Birliyində geniş tətbiqi nəzərdə tutulub.

ARDNŞ-dan «APA-Economics»ə verilən məlumata görə, beynəlxalq maliyyə uçotuna keçidlə əlaqədar «Azərikimya» İB-nin uçot sistemindəki məlumatların vaxtında və dəqiqliklə əldə olunması imkanlarının genişləndirilməsi məqsədi ilə 2011-ci ildən qurumda bütün maliyyə-hesabat əməliyyatlarının tam olaraq SAP sisteminə keçilməsi nəzərdə tutulub.

Sentyabrın ilk günlərindən ARDNŞ-ın «Azərikimya» İB-nin İqtisadiyyat və uçot İdarəsinin bütün şöbələrinin, həmçinin kadrlar şöbəsinin əməkdaşları üçün beynəlxalq uçot sistemi olan SAP ERP-yə keçidlə əlaqədar xüsusi kurslar fəaliyyətə başlayıb. Birliyin uçot-mühasibat işləri ilə əlaqəli olan əməkdaşlarının yeni sistemi həm nəzəri, həm də praktiki cəhətdən mükəmməl öyrənmələri üçün ARDNŞ-ın SAP ERP-yə dəstək qrupunun mütəxəssisləri dinləyicilərlə məşğələlər üçün bugünlərdə «Azərikimya»ya ezam olunub. Birliyinin yeni yaradılmış xüsusi tədris zalında ARDNŞ-in İnformasiya Texnologiyaları və Rabitə İdarəsinin təcrübəli mütəxəssislərinin həyata keçirdikləri kurslara üç modul üzrə 80 nəfərə yaxın işçi cəlb olunub.

Qeyd edək ki, uçot sistemində operativlik və nəticənin sürətləndirilməsini təmin edən SAP ERP sisteminin nəzəri əsasları və bu sistem üzrə işin aparılması ilə praktik olaraq tanış olmaq, onun ilkin prinsiplərini öyrənmək məqsədi ilə avqust ayının əvvəllərində «Azərikimya» İB-nin mərkəzləşdirilmiş mühasibatlıq, satınalmalar və təchizat, marketinq və satış, kadrlar və kadr hazırlığı, personal və əmək haqqı, maliyyə və vergilər şöbələrindən, həmçinin anbar təsərrüfatından bir qrup mütəxəssis ARDNŞ-ın İnformasiya texnologiyaları və Rabitə İdarəsində 10 gün ərzində ilkin kurs və müvafiq təcrübə keçiblər.