Maliyyə

Ana səhifə

Maliyyə

Azərbaycanın FATF-ın xüsusi siyahısından çıxarılacağı gözlənilir

07 sentyabr 2010 08:29 (UTC +04:00)

Azərbaycanın Maliyyə Monitorinqi Xidmətindən «APA-Economics»ə verilən məlumata götə, səfərdə məqsəd cinayət yolu ilə əldə edilmiş pul vəsaitləri və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə (PL/TMM) sahəsində Azərbaycanın əldə etdiyi nailiyyətlərlə yerində tanış olmaqdır.
Qeyd edək ki, FATF PL/TMM sahəsində strategiyaların həm ölkədaxili, həm də beynəlxalq səviyyədə hazırlanması və təbliği məqsədini qarşısına qoymuş və 1989-cu ildə G-7 ölkələrinin Paris sammitində yaradılmış hökumətlərarası qurumdur. FATF PL/TM-ə qarşı fəaliyyət üzrə beynəlxalq standartları müəyyən edir, bu standartların ölkələr tərəfindən tətbiqini qiymətləndirir və dövlətlər üçün icrası məcburi xarakter daşıyan qərarlar qəbul edir.

FATF 2009-cu ildə 140-a yaxın ölkədə PL/TMM sahəsində boşluqları qiymətləndirib və bu qiymətləndirmə əsasında ölkələri PL/TMM sahəsində mövcud olan risklərə görə üç qrupa ayırıb: PL/TMM sahəsində mühüm çatışmazlıqlara malik olması ilə əlaqədar barəsində sanksiyalar tətbiq edilən ölkələr; PL/TMM sahəsində boşluqlara malik olan və bu istiqamətdə FATF ilə əməkdaşlıq etməyən ölkələr; PL/TMM sahəsində boşluqlara malik, lakin onların aradan qaldırılması üçün siyasi iradəyə və xüsusi fəaliyyət planına malik olan ölkələr.

Nəticədə, Azərbaycan üçüncü qrupa daxil edilib və boşluqların aradan qaldırılması üçün qarşılıqlı şəkildə razılaşdırılmış fəaliyyət planı təsdiq edilib. FATF-ın 2010-cu ilin iyun ayında keçirilmiş növbəti plenar iclasında aparılan müzakirələr zamanı Azərbaycanın PL/TMM sisteminin inkişafı ilə bağlı tədbirlər planının uğurla icra etdiyi qeyd olunub, o cümlədən, milli qanunvericiliyin təkmilləşdirilməsi, habelə Maliyyə Monitorinqi Xidmətinin funksionallığının artırılması ilə bağlı fəaliyyətlər təqdir edilib.

Bununla da həmin iclasda Azərbaycanın FATF-ın siyahısından çıxarılması üçün müvafiq proseduralara başlanılması məqsədəuyğun hesab edilib. Bununla əlaqədar olaraq, PL/TMM sisteminin inkişafı ilə bağlı beynəlxalq təşkilatlar tərəfindən irəli sürülmüş tövsiyələrin icrası istiqamətində aparılmış islahatların və fəaliyyətlərin nəticələri ilə əyani şəkildə tanış olmaq üçün Azərbaycana müvafiq qiymətləndirmə missiyasının göndərilməsi barədə qərar qəbul edilib. Beləliklə, bu missiyanın nəticəsindən asılı olaraq Azərbaycanın FATF-ın «xüsusi diqqət tələb edən» ölkələrin siyahısından tam olaraq çıxarılacağı gözlənilir.
FATF-ın missiyasının ölkəyə səfəri çərçivəsində Azərbaycan Nazirlər Kabinetində, Mərkəzi Bankda, Milli Təhlükəsizlik Nazirliyində, Maliyyə Monitorinqi Xidmətində, Baş prokuror yanında Korrupsiyaya qarşı Mübarizə İdarəsində, Qiymətli Kağızlar üzrə Dövlət Komitəsində, habelə bir sıra kommersiya banklarında görüşlər keçiriləcək.

Keçiriləcək görüşlər və aparılacaq müzakirələrin əsas məqsədi Azərbaycanda PL/TMM sisteminin inkişafı ilə əyani surətdə tanış olmaq, müvafiq məsələlər barədə səlahiyyətli orqanlarla müzakirələr aparmaqdır.

«Azərbaycanda maliyyə-iqtisadi sistemdə şəffaflığın artırılması və təhlükəsizliyin gücləndirilməsi istiqamətində həyata keçirilən tədbirlər çərçivəsində PL/TM-lə effektiv mübarizə sisteminin daha da təkmilləşdirilməsi ölkənin maliyyə sisteminə beynəlxalq etimadın yüksəlməsinə şərait yaradır», - deyə Maliyyə Monitorinqi Xidmətindən bildirilib.