Maliyyə

Ana səhifə

Maliyyə

«Paşa Holding»in təsis etməyi planlaşdırdığı həyata sığortası şirkətinə əsas təyinatlar həyata keçirilib

26 oktyabr 2010 09:15 (UTC +04:00)

Bakı. Elnur Hüseynquluyev – APA-Economics. Azərbaycan Maliyyə Nazirliyi tərəfindən sığortaçıların rəhbər vəzifələrinə namizədlər və sığorta vasitəçiliyi fəaliyyətinə lisenziya almaq istəyən fiziki şəxslər üçün keçirilmiş növbəti test imtahanının nəticələri açıqlanıb.

Maliyyə Nazirliyinin Dövlət Sığorta Nəzarəti Xidmətindən «APA-Economics»ə verilən məlumata görə, imtahanda iştirak etmiş 17 nəfər rəhbər vəzifəyə namizəd olan şəxslərdən qaydalara uyğun olaraq təqdim olunmuş 100 test sualının ən azı 70-nə düzgün cavab vermiş 11 iştirakçı, sığorta vasitəçiliyi fəaliyyətinə lisenziya almaq istəyən 19 nəfər fiziki şəxsdən isə 15 nəfər imtahandan müvəffəqiyyətlə keçib.

Qeyd edək ki, imtahanda yeni yaradılacaq «Paşa Həyat Sığorta» şirkətinin İdarə Heyətinin sədri, İdarə Heyətinin üzvü, həmçinin Təftiş Komissiyasının sədri və üzvləri vəzifəsinə namizədlər iştirak edib. Bununla da, şirkətin İdarə Heyətinin sədri vəzifəsinə Mürsəl Rüstəmov, İdarə Heyətinin üzvü vəzifəsinə Niyazi İsmayılov, Təftiş Komissiyasının sədri Ülviyyə Cabbarova, üzvləri Zaur Əliyev, Dilbər Hüseynova, daxili audit xidmətinin rəhbəri Günel Abbasova, aktuari vəzifəsinə isə Dilarə Əsədova təyin ediliblər.

«Paşa Sığorta» şirkətinin İdarə Heyətinin sədri Nofəl Rzayevin «APA-Economics»ə verdiyi məlumata görə, «Paşa Həyat Sığorta» şirkətinin yaradılması ilə bağlı ilkin mərhələyə başlanılıb. Sonrakı mərhələdə lisenziya məsələsi həll ediləcək, şirkətin təsisçisi rolunda isə «Paşa Holding» Şirkətlər Qrupu çıxış edəcək.

Xatırladaq ki, Azərbaycanda həyat sığortası fəaliyyəti ilə məşğul olan ilk şirkət «Atəşgah Həyat Sığortası» olub.

Qeyd edək ki, «Sığorta fəaliyyəti haqqında» qanuna uyğun olaraq, həyat sığortası üzrə yeni yaradılacaq şirkətin rəhbər işçiləri təsisçi tərəfindən əvvəlcədən təsdiq olunur.