Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsinin sədri Dünya Bankı və SECO-nun nümayəndə heyətini qəbul edib

26 oktyabr 2010 15:25 (UTC +04:00)

Bakı. Nicat Mustafayev – APA-Economics. Bu gün Azərbaycan Qiymətli Kağızlar üzrə Dövlət Komitəsinin (QKDK) sədri Rüfət Aslanlı Bakıda səfərdə olan Dünya Bankının (DB) maliyyə sektoru üzrə aparıcı mütəxəssisi Maykl Edvardsın rəhbərliyi ilə DB və İsveçrə İqtisadi Məsələlər üzrə Dövlət Katibliyinin (SECO) nümayəndə heyətinin qəbul edib.
QKDK-dan «APA-Economics»ə verilən məlumata görə, görüşün əsas məqsədi DB-nın Ölkəyə Yardım Strategiyası çərçivəsində kredit portfelinə daxil edilməsi nəzərdə tutulan «Kapital bazarlarının modernləşdirilməsi Layihəsi»nin hazırlığı statusuna dair müzakirələrin təşkil edilməsindən ibarət olub.
Görüş zamanı R.Aslanlı ölkənin son dövrlər iqtisadi sahədə əldə etdiyi nailiyyətlərdən bəhs edərək, ötən dövr ərzində DB tərəfindən idarə edilən və bir sıra mötəbər beynəlxalq təşkilatlar tərəfindən maliyyələşdirilən «FİRST İnitiative Program»ı çərçivəsində qiymətli kağızlar bazarının inkişafına dair ortamüddətli strategiyanın hazırlanması istiqamətində görülən işləri qənaətbəxş hesab etdiyini və «Kapital bazarlarının modernləşdirilməsi Layihəsi»nin yeni strategiyanın reallaşdırılması istiqamətində dəyərli töhfə olacağına ümid etdiyini bildirb. QKDK sədri bu istiqamətdə təşəbbüslərin DB tərəfindən dəstəkləndiyinin əhəmiyyətini qeyd edərək, Azərbaycanda maliyyə xidmətlərinin çeşidinin genişləndirilməsi və maliyyə institutlarının təkmilləşdirilməsi işinin iqtisadi sahədə, xüsusilə də qeyri-neft sektorunun inkişafı istiqamətində gələcək dövrlər üçün əsas proritetlərdən olduğunu görüş iştirakçılarının diqqətinə çatdırıb.
Öz növbəsində M.Edvards bu sahənin inkişafının ölkənin qeyri-neft sektorunun inkişafı istiqamətində sağlam maliyyə platformasını təmin edəcəyinə əminliyini bildirib.
Qeyd edək ki, görüşdə DB və SECO ilə potensial əməkdaşlıq çərçivəsində həyata keçiriləcək yeni layihənin implementasiya mexanizmləri, inkişaf məqsədləri və nəticə göstəricilərinə dair fikir mübadiləsi aparılıb.