Maliyyə

Ana səhifə

Maliyyə

Azərbaycan ÜTT-yə sərfəli şərtlərlə üzv olmaq niyyətindədir

27 oktyabr 2010 09:00 (UTC +04:00)

«APA-Economics»in məlumatına görə, beynəlxalq təcrübənin öyrənilməsi ilə yanaşı konfransda həmçinin Azərbaycanın ÜTT-yə üzvlük strategiyası olub ki, bunu da toplantıda çıxış edən Azərbaycanın xarici işlər nazirinin müavini Mahmud Məmmədquliyev ətraflı açıqlayıb.

Belə ki, konfrasnın mühüm əhəmiyyət kəsb etdiyini vurğulayan M.Məmmədquliyev bildirib ki, hazırda Azərbaycan iqtisadiyyatı inkişafın yeni mərhələsinə daxil olmaqdadır. Bu mərhələ iqtisadiyyatın modernləşdirilməsini əhatə etməklə, bütün sahələrin Avropa standartlarına uyğunlaşdırılması, Azərbaycanın inkişaf etmiş ölkəyə çevrilməsini təmin etməlidir. Bununla əlaqədar olaraq, ölkənin ÜTT-yə üzv olmasının vacibliyi və mahiyyəti daha da artır. M.Məmmədquliyevin sözlərinə görə, Azərbaycan Təşkilata üzvolma prosesini gücləndirmək niyyətindədir ki, bu istiqamətdə artıq fəal iş aparılır. Belə ki, son zamanlar Azərbaycanda 20-dən artıq qanun və normativ aktlar ÜTT-nin tələblərinə uyğunlaşdırılıb və həmin proses davam etdirilir.

Eyni zamanda M.Məmmədquliyev vurğulayıb ki, Azərbaycanın ÜTT-yə üzvolma strategiyası ölkənin maraqlarını, iqtisadiyyatın xüsusiyyətlərini nəzərə alır. Bu da o deməkdir ki, ölkə ÜTT-nin qarşısında belə bir öhdəliklər üzərinə götürür ki, onlar iqtisadiyyatın inkişafına, rəqabət qabiliyyətinin artırılmasına, qeyri-neft sektorunun inkişafına xidmət etsin.

Nazir müavinindən sonra çıxış edən Xarici İşlər Nazirliyi İqtisadi əməkdaşlıq və inkişaf Departamentin nümayəndəsi xanım Selcan Verdiyeva və İqtisadi İnkişaf Nazirliyi xarici ticarət siyasəti və Ümumdünya Ticarət Təşkilatı şöbəsinin müdiri Bəxtiyar Əlişov öz çıxışlarında üzvolma prosesinin hazırkı vəziyyəti və əsas çətinlik barədə konkret məlumat veriblər. Belə ki, Azərbaycan ÜTT-yə üzv olmaq üçün ərizəni 1997-ci ildə təqdim edib, 2004-cü ildən isə üzvolma prosesi çərçivəsində artıq konkret danışıqlar və işlər aparılır. Bu günə kimi Azərbaycan bir sıra çoxtərəfli və ikitərəfli ticarət əlaqələrinə dair sazişlər imzalayıb, ÜTT-nin müşahidəçi statusuna malik olmaqla Təşkilatın iclaslarında iştirak edir. Çətinliklərə gəldikdə, onların ən əsası Azərbaycan və ÜTT-nin ölkənin üzvlük statusu ilə bağlı mövqelərinin üst-üstə düşməməsi ilə bağlıdır. Belə ki, Azərbaycan digər beynəlxalq təşkilatlardakı statusu və bir sıra makroiqtisadi və sosial meyarları əsas gətirərək ÜTT-yə inkişafda olan ölkə kimi daxil olmaq niyyətindədir. ÜTT-nin mövqeyi isə Azərbaycanı inkişaf etmiş ölkə öz sıralarına qatmaqdır. Qeyd edək ki, inkişafda olan ölkənin statusu ölkəyə bir sıra əhəmiyyətli güzəştlər və tələblərdə yumşaltmaları nəzərdə tutur ki, Azərbaycan bunlardan faydalanmaq niyyətindədir.

Konfransda həmçinin ÜTT üzvlüyünün ticarətə, gömrük sisteminə, sosial-iqtisadi inkişafa, kiçik və orta sahibkarlığa edilən təsiri üzrə beynəlxalq təcrübələrə dair məruzələr dinlənilib.